Ta importante pa aumenta resilencia di economia den region contra vulnerabilidadnan causa pa cambio di clima

Prome Minister Evelyn Wever-Croes na New York

ORANJESTAD (AAN): Prome Minister Evelyn Wever-Croes a atende un evento di Reino Hulandes riba e tema di awa. E conferencia a wordo organisa pa Minister Liesje Schreinemacher di Buitenlandse Handel en Ontwikkelingssamenwerking di Hulanda y Prome Minister di Hulanda tambe tabata presente. Prome Minister Wever - Croes na e ocasion a splica di e importancia di awa pa Aruba y importancia pa traha hunto.

    Aruba como un isla rondona di awa tin hopi experiencia cu maneho di awa. For di e experiencia aki a siña con pa balora cooperacion y “partnerships”.  Como Isla Chikito den Desaroyo/Small Island Developing States (SIDS), Aruba ta cay den categoria di paisnan cu ta mas vulnerabel y consecuentemente tin mas chens pa sinti e efectonan di cambio di clima. Algun di e efectonan cu Aruba ya caba ta sinti di e cambio di clima ta: temperatura y nivel di lama ta subi mas liher, cual tin un efecto significante riba e economia. Ademas na mes momento cu yobida a reduci, e periodo di secura a aumenta drasticamente afectando e factor di seguridad di cuminda.

   Prome Minister a sigui splica cu como pais  tin e deber pa salvaguardia rikesa y biodiversidad riba tera y den lama. Pues tin un gran urgencia pa aumenta e resilencia di e economianan den e region, contra  vulnerabilidadnan a consecuencia di clima y desbalance di medio ambiente.

Un aspecto cu ta importante pa aumenta e resiliencia ta, cu Aruba mester un “Integrated Water Management”. Na Aruba ta produci calidad halto di awa pa bebe via un proceso di desalinacion. E proceso aki ta costa hopi energia y hopi costoso, cual ta significa cierto dependencia riba “fossil fuels”. Ademas e tecnologia aki,  ta resulta den entre otro aumento di costo di pa comunidad.

   Finalmente, Prome Minister a expresa cu banda di e retonan aki tin varios reto ainda den cuadro di desperdicio y tambe agricultura, pero e compromiso di demas pais ta importante, specialmente ora ta trata di financiamento pa Paisnan Chikito den Desaroyo/SIDS.