Publico a acudi Diasabra na ‘Expo Promove Salud y Bienestar 2022’

ORANJESTAD (AAN): Manera tabata ser planea, Diasabra a tuma lugar e  Expo “Promove Salud y Bienestar” 2022,

cu enfoke riba malesanan cronico den Centro Deportivo Libertador Betico Croes.  E actividad tabata di 10’or di mainta pa 5’or di atardi.

   E Expo aki tabata dirigi no solamente na personanan cu tin malesa cronico sino tambe riba prevencion. Pues no ta solamente pa hende di edad cu ta sufri di malesanan cronico pero tambe pa hendenan jong, pa nan sa con pa preveni den futuro y pa e siguiente generacionnan.

   DIARIO a nota cu tabatin diferente experto cu ta bay duna informacion, como tambe gruponan di IBiSA, miembronan di DVG, tambe di Salud Hubenil cu ta enfoca riba e programa Scol Saludable, Stichting BOB pa duna informacion tocante cancer na pecho y pa hendenan haci cita tambe. A mira tambe Cruz Cora, Famia Planea, FAVI, Fundacion Movemento ta Bida, HAVA, Banco di Sanger, pues tin persona riba tereno di salud cu lo duna nan interes pa esaki, pero tambe pa den futuro por logra mas y yuda otronan tambe.