Ainda falta 13 depresion tropical:
ORANJESTAD (AAN) – Relaciona cu mal tempo, Cientificonan a determina cu Aruba ta bay tin 22 depresion tropical y Diabierna apenas tabata tin e #9. Falta ainda 13 pa bay, y ta conoci cu e parti Oost di Caribe ta haye entre Augustus y September, y October, November, ta pa Aruba.
Asina Hefe di Bureau Rampenbestrijding Aruba, a comenta. “Kiermen, ban keda alerta. E aña aki ta e di dos cu nos a haya y awo su piek ta bay drenta, cu nos lo keda haya molesternan, pero nos ta bay determina con grave e situacion ta, pa nos no bay core cada biaha den un warning of alerta innecesario.
Nos mester por biba cu un tiki awacero. Di awo tur hende sa cu un awacero bao di 80 milimeter practicamente nos ta wanta Aruba normal; si determina cu tin mas cu 80 milimeter di awa, nos lo saca accionnan pa bisa wanta e lugarnan cera, pa scapa bida, scapa propiedad”, Rino Hermans a subraya.
El reitera cu pa loke ta ABC awo ta bay drenta den su piek. Na Islanan ariba e piek ta bahando y ta bay subi pa ABC.
“Historia ta mustra cu den lunanan di October y November, tin hopi actividad rond di e Islanan ABC”, Hermans a acentua.
El a agrega cu ta bay tin awacero local, y ora papia di awacero local no kiermen awacero torencial. Kiermen, awa por bay fingi cu ta bay yobe, pero esey no ta motibo pa para tur evento. Awacero ta parti di naturaleza y nos tin cu biba den e sistema, Hermans a remarca.
