Ta calcula cu rond di 4 mil pa 5 mil hende tabata move den Caya Grandi durante Ban Bek Caya  

ORANJESTAD (AAN): Diabierna 6 di juni, Caya G.F. Betico Croes, miho conoci como Caya Grandi,

a bolbe yena cu bida durante e prome edicion di Ban Bek Caya, un iniciativa colectivo di Gobierno di Aruba den colaboracion cu Departamento di Cultura y Aruba Tourism Authority (ATA), cu e meta pa trece movecion di hende bek den caya principal y stimula comercio den e area.

            Durante e evento, miles di hende a sali pa gosa di ambiente, disfruta di e variedad di cuminda local, cumpra productonan nobo y descubri tiendanan den caya principal cu a sa di duna descuentonan atractivo riba un cantidad di producto. No ta un secreto cu e evento aki a trece bida bek den comercio y esaki a keda comproba.

            Segun Robert Montilla, productor local di honing "Mi no tabata sa kico pa spera… pero nos ta practicamente sold out caba!". "Iniciativanan manera esaki ta hopi bon pa yuda comercio local crece."

            Florentijn van der Palm, Manager di Cookout "E caya tabata yena cu hende y hopi ambiente. Un bon bista pa futuro."

            Durante di e evento, un cantidad di turista a uza e tram pa move di un sitio pa otro. “E turnout tabata grandi” y segun Baptist, Operations Supervisior di Arutram, cu ta calcula alrededor di 4000 pa 5000 hende cu tabata move rond den Caya Grandi. Den su añanan cu Arutram, Mervin Baptist nunca a yega di mira tanto hende den Caya Grandi y ta spera cu esaki lo sigui.

            Roos Broekhuizen di Mrs Minute mes no a participa comercialmente cu e anochi di Ban Bek Caya pero a keda impresiona cu e cantidad enorme di bishitante. “Tabatin variedad di cuminda, tiendanan tabata yena y ambiente tabata unico”. Sra. Broekhuizen ta urgi si pa otro companianan cu tin parkeo disponibel, pa coopera y pone esakinan disponibel pa eventonan asina grandi. Tabata prome biaha cu sra. Boekhuizen a wak un Caya Grandi asina yen y cu tanto movecion y ambiente.

            Sra. Sulanjis Wever doño di Star Fashion a duna di conoce cu Ban Bek Caya a resulta den aumento di benta di 600% pa Star Fashion compara cu cualkier diabierna di benta. “E evento tabata spectacular pa Star Fashion”. Star Fashion ta cla pa contribui na e exito di Ban Bek Caya dunando ofertanan unico di compras.

            E organisadonan ta mira e proyecto piloto aki como un exito rotundo y ta preparando e di dos edicion di Ban Bek Caya pa yuda duna e impulso necesario na e zona comercial importante.

“Ban Bek Caya” a resulta di ta un iniciativa cu ta duna atencion real na comercio den Caya Grandi, y ta priminti di bira e evento mensual mas grandi na Aruba.

            E ambiente familiar y alegria cu tabata reina durante e anochi aki, a duna un sentido di optimismo pa e revitalisacion di comercio den Caya Grandi.