Aruba tin cuater sorto di turtuga di lama y nan ta den peligro di extincion

Awe ta Dia Mundial di Turtuga di lama

ORANJESTAD (AAN) – Awe dia 16 di juni ta observa e Dia Mundial di e Turtuga Marino, of Turtuga di Lama.

            Den e Dia Mundial di turtuga Marino 2025, ta wordo destaca cu tin seis especie di e turtuganan aki, clasifica como den peligro critico, cu excepcion di e turtuga plat, cual estado di datonan ta deficiente pa falta di informacion.

            Segun un evaluacion realiza door di e Union Mundial pa e Naturaleza(UICN), specificamente e turtuga berde a wordo evalua na 2004, y el a wordo considera “den peligro” ya cu su poblacion global a reduci cu mas di 50% den e ultimo tres generacionnan (un periodo entre 106 pa 150 aña).

            No obstante, e publicacion ta indica, ora ta wordo analiza na escala regional, e panorama por cambia. Un estudio reciente haci pa Annette Broderick y otro stakeholders e ta presenta datonan di e poblacion di turtuga berde cu tin neishi den e Isla Ascension, na lama Atlantico, e poblacion aki a sufri un disminucion, en pasado, debi na caza intensivo, pero a mustra un notable recuperacion, durante e ultimo decadanan.

            Actualmente, e cantidad di neishi ta comparabel na esun di siglo XIX, loke ta nifica cu si e poblacion aki lo wordo evalua di manera separa e lo no ta na peligro. Ademas, ta wordo indica cu no solamente e poblacion di Isla Ascension ta aumentando pero tin otro colonianan importante den e Atlantico cu tambe ta mustra un crecemento di e cantidad di neishinan.

            Por ehemplo, esaki ta e caso di e Isla Tortuguero na Costa Rica, Bijagos (Guinea Bissau) Isla Trinidad na Brasil, Yucatan, Mexico, y na parti West di Guyana Frances. No obstante si tin regionnan unda a detecta un disminucion reciente, manera Isla Aves na Venezuela, Bioko (Guinea Ecuatorial).

Pesey, Broderik y su coleganan ta propone haci un evaluacion di e estado di conservacion  na nivel regional, pasobra clasifica tur e turtuganan berde como den “estado di peligro” por resulta contraproducente.

            Aruba su awanan teritorial ta conta cu cuater sorto di especie di turtuga di lama cu for di maart te cu december ta subi tera na costa pa pone webo:  Caret (Eretmochelys imbricata); Cawama (Caretta caretta); Turtuga blanco; (Chelonia mydas); y tambe e Driekiel (Dermochelys coriacea). Nan tur ta den peligro di extincion, y pa tal motibo su proteccion ta di vital importancia.

            Tin varios organisacion na Aruba cu ta dedica nan mes na e proteccion di e turtuganan marino, cu por cierto, ta depende tambe di fondonan di instancianan estatal y di comunidad, pa sigui proteha nan.