Directora di Respaldo:
*A cuminza duna pasonan caba!
ORANJESTAD (AAN) – Caroline Hart, Director di Respaldo, a splica den entrevista cu DIARIO cu nan ta den combersacion cu e Organo Ehecutivo AZV, pa pone fondonan disponibel pa e crecemento di e demanda cu tin riba tereno di cuido di salud mental.
“E tin AZV su atencion, y nos ta hopi agradecido tambe na AZV. Ora cu nos bin cu e puntonan aki, nan tin oido p’e, y nan ta wak tambe e necesidad di busca solucionnan pa esaki”, Caroline Hart a indica.
El a agrega cu tin hopi aspecto cu Respaldo ta bezig cu ne, por ehemplo e “E-Health”. “Nos ta bezig ta sondeando e posibilidadnan cual ta e grupo di personanan cu nos tin, cu no tin problema pa haya tratamento online, anto e ora ey nos por busca cooperacion cu psicologonan eyfo via online, cu si ta papia Papiamento, cu si ta domina e idioma cu e pashent ta domina, cu e ora ey mas lihe e pashent por wordo yuda, si esnan cu nos tin den servicio no ta suficiente. Tur esaki nos ta trata continuamente cu AZV, pa baha e presion y tur hende wordo yuda mas lihe cu ta posible”, Caroline Hart a indica.
Directora di Respaldo a reitera cu e demanda ta sigui crece. “Y bo no tin cu tene cuenta solamente cu bo poblacion, pero tambe cu bo poblacion di turista, cu tambe ta sigui crece. Bo poblacion di personanan indocumenta, tambe ta bin cu un demanda cu ta pone presion riba bo organizacion. P’esaki tambe nos tin atencion. Respaldo kier yega na un propio edificio”, señora Hart a señala.
El a sigui splica cu e clinica na unda nan ta actualmente, banda di Hospital, ta data for di añanan 80. E clinica a wordo traha pa un Aruba cu tabata tin 60 mil habitante.
“Aworaki nos ta dobel di esey sin conta e turistanan cu nos ta haya anualmente. Dus, nos tin plannan concreto pa bin cu un clinica nobo, nos ta bezig caba cu e fase di inventariza tereno, kiermen, hopi lige den un futuro cercano nos ta spera di brinda Aruba un clinica nobo, moderno y cu tin tur e servicionan y acomodacionnan necesario pa un clinica psikiatrico cu por cumpli cu tur e tecnica, tecnologia, infrastructura necesario”, señora Caroline Hart, directora di Respaldo, a duna di conoce.
