Ta bay implementa un base di dato cu registracion di tur cacho na Aruba

Irene Croes di Centro di Control di Cacho:

ORANJESTAD (AAN):  E problematica di cachonan sin doño riba caya ta keda un preocupacion. Esaki ta locual Centro di Control di Cacho (CCC) a duna di conoce diamars mainta den un conferencia di prensa.

Irene Croes, directora di e CCC a declara cu  esaki ta keda un problema pa comunidad en general ya cu e cachonan aki por morde cualkier persona riba caya. Pesey un biaha mas el a haci un apelacion na comunidad pa tene cuenta cu e ley di cacho cu ta bisa pa tur hende tin nan cacho den cura.

Ta un obligacion pa ley y si un persona no por cera e cura, e ley ta hasta ta brinda e posibilidadnan con pa mantene bo cacho den cura apesar cu bo por cera bo cura, a bisa.

Croes a agrega cu hopi di e cachonan cu ta los riba caya no ta registra na ningun caminda y esaki ta algo cu CCC ta trahando riba dje.

Ta bay cuminsa haya informacion for di tur veterinario na Aruba tocante bo mascota y si e persona no ta desea pa su informacion wordo comparti cu CCC, lo ta bon pa bisa e veterinario ya cu sino automaticamente CCC lo haya e datonan ey, Irene Croes a indica.

Mientras cu no ta obligacion pa ley pa bo mascota ta registra den un base di datonan central ainda por pidi pa no comparti esaki. Pero un bes, cu e ta un obligacion, no lo por evita esaki mas, a enfatisa.

Un peticion a bay pa tur doño registra nan mascota pa asina cu nan perde si nan yega na CCC, nan por tin un number di telefon y un adres pa contact e doño pa asina e cacho wordo reubica. Mescos den caso di pushinan.