FADA ta pidi mayornan pa paga tino
ORANJESTAD (AAN): Riba Dia Mundial di Bisa No na Tabaco, Fundacion Anti Droga Aruba (FADA), a duna atencion na e tema di 'vaping'.
Amyna Kelly, trahador preventivo di e fundacion a indica cu nan ta haya hopi yamada di scolnan y mayornan cu ta preocupa pa cu e uzo di 'vaping' bao di e hobennan.
El a laga sa cu 'vaping' a wordo introduci pa personanan cu tin un adiccion na sigaria pa nan baha e uzo di sigaria pa medio di 'vaping'.
Pero mirando cu e hobennan ta haciendo uzo di dje sin sa e consecuencianan cu tin tras di esaki. 'Vaping' ta contene e kimico di nicotina cual ta e kimico mas adictivo cu tin y un bes cu bo curpa gusta esaki, e ta bay keda pidi bo esaki. Otro consecuencianan ta cancer di pulmon, iritacion di garganta, entre otro.
'Vaping' ta bin den diferente forma. El a cuminsa na un forma di sigaria y el a bay na un forma di un pen y awor e tin un forma di 'muts' mas grandi cu ta contene likidonan di diferente sabor y mayoria di nan ta contene nicotina.
Tin tambe 'vaping' den forma di USB Stick y e hobennan ta uzando esaki hopi. Nan ta hinca e likido den dje pa asina haci uzo di dje, Kelly a splica.
El a enfatisa cu ta hopi importante pa e mayornan como tambe e scolnan pa pone mas atencion na esaki pasobra e muchanan por cana cu e USBnan aki den nan saco di carson of den nan tas. E por mustra ta hasta manera un 'lipstick'.
E ta recomenda pa papia cu e yiunan di un manera mas habri tocante di 'vaping', e consecuencianan y duna nan e informacion cu nan mester di un forma corecto.
