Ta bay cuminza cobra un impuesto di 35 dollar pa cabes na turistanan asina yega Aeropuerto

Pa yega na fondo pa privatiza RWZI y Aviacion Civil:

ORANJESTAD (AAN)—Minister Ursell Arends, titular di Transporte, Naturaleza, Integridad y Asunto di Adulto Mayor, den entrevista cu DIARIO a declara cu durante e tratamento di presupuesto 2024, a elabora riba e proceso di kico ta lo bay ta e caminda cu ta bay tuma pa privatiza RWZI, pero tambe Aviacion Civil.

E mandatario a comenta cu ora e Comision a yam’e el a bay Parlamento, p’asina elabora y comparti informacion cu tur e fraccionnan tocante kico ta e pasonan cu gobierno a dicidi di tuma. Ya caba e concepto di ley a bay Raad van Advies y a bin bek.

Arends a indica cu e report final a wordo termina, p’asina e concepto final di ley bay pa Sala di  Parlamento e ta premira cu pa fin di Januari of inicio di Februari e Ley aki por wordo trata den Parlamento.

Pa loke ta e contenido di e ley aki mes, e minister a bisa cu informacion cu a yega eyfo no ta completamente corecto; e suma cu nos ta papiando di dje ta 35 dollar, cual ta inclui tambe fondonan pa privatiza Departamento di Aviacion Civil.

Binti dollar lo bay pa e inversionnan cu mester wordo haci pa traha un RWZI completamente nobo, pero tambe pa cambia e sistema di riolering cu tin na Aruba y cu tin mas of menos 50 aña bieu. Y e problema cu tin, segun e dignatario, ta cu mayoria di e liñanan ta di asbesto, y ta bay rekeri di inversionnan cuantioso pa cambia e sistema di riolering y traha un RWZI totalmente nobo.

El a splica cu un bez cu e pasahero ta yega aeropuerto e impuesto aki ta wordo cobra pa cabes, y di e momento ey ta wordo parti den e proyectonan cu a wordo asigna.

Encuanto Directie Luchtvaart, minister Arends a bisa cu esaki ta un departamento esencial, vital pa Aruba, y Aruba tin cu cumpli cu tratadonan internacional y despues di combersacionnan cu tabata tin cu ICAO, ya caba na Februari 2022, a dicidi cu esaki ta e miho manera pa bay cu ne pero esaki t cosnan cu mester wordo dialoga e trahadornan, sindicato, pa yega na palabracionnan concreto. El a reitera cu e suma ta 35 dollar pa cabes y e ta wordo reparti na e dos proyectonan menciona, unda 20 dollar ta bay pa RWZI.