Despues di Carnaval 2024 brote di accion politico spera na Aruba
*Resultado historico di gobernacion Aruba y reto di continuacion
*Era di cambio politico den Reino y 23% labor mundial na peliger
ORANJESTAD (AAN) — Segun tur informacion cu ta alcansa DIARIO di mundo politico na Aruba, directamente despues di celebracion di Carnaval na 2024, por spera activacion grandi den mundo politico na Aruba, cu medio 2025 lo ta central den eleccion pa Parlamento di e pais.
Aruba, na e momento aki conoce un situacion nacional unico den un mundo di turbulencia grandi y hasta un Reino di incertidumbre total.
Ta keda un hecho cu e aña prome cu eleccion na un pais, normalmente conoce aumento di accion politico, loke sigur lo ta e caso na Aruba.
Resultadonan di 2024 lo ta di gran importancia pa Aruba, cu ta enfrenta uno di su momentonan politico mas doloroso ora den Corte di Husticia, caso Avestuz continua pa presenta atrobe na mundo, e bofon cu a wordo haci di e cuadro di Leynan di Aruba, manera den Sala di Corte di Husticia den Prome Instancia, a keda presenta.
2024 a habri Aruba cu un representante di Pueblo cu Huez a condena na prison, pero cu forzosamente pa falta di Ley necesario, Pueblo mester acepta como su representante.
Un mancha doloroso asina a wordo pone riba Aruba, pais di logronan enorme den Reino, cu a base di un bon gobernacion, a entrega na Reino e ehempel con mester atende cu placa di Pueblo pa democracia por ta realmente un instrumento di Pueblo.
E mancha doloroso aki a produci kiebra den partido AVP, un situacion cu lo por aporta na mas sosten na partidonan nobo, introduccion di mas partido nobo pero tambe retiro di politica activo.
Ya ta conoci cu partidonan nobo ta forma segun e conceptonan di democracia y reglanan electoral di e pais.
E totalidad di accion cu mester tuma lugar na 2024 na caminda pa eleccionnan na 2025, lo tuma lugar durante un tempo cu pa Aruba cu a conoce un recuperacion enorme y un brote di bienestar, lo ta dificil pa realisa.
Sinembargo, Aruba mester realisa e problemanan serio di mundo actual y cambionan di Reino Hulandes, cu na prome lugar nos kier aborda.
Te ainda formacion di un Gobierno nobo, cu no tabata riba lista di espectativa di Hulanda na inicio di 2023, no a wordo conclui.
Cu e lo contene cambio di maneho na e pais mas grandi di Reino, Hulanda, y pa Reino mes, ta sigur.
Ya ayera por a nota con e pensamento pa Rey tambe paga belasting, conoce un gran mayoria den Parlamento Hulandes.
Mientras na Aruba por spera cu e aumento di personanan y partidonan cu ta participa na eleccion 2025 lo nifica aumento, e realidad mundial y den Reino cu Aruba lo mester enfrenta, mester keda central.
Mientras na Aruba situacion financiero, economico cu ta refleha su mes den condicionnan social a conoce mehoracion enorme, den e Forum Economico Mundial 2024 a bini dilanti, cu durante e proximo 23 aña, 23 porciento di tur cupo di trabou na mundo lo conoce cambio pa motibo di transformacion industrial a base di cambio genera pa entre otro inteligencia artificial.
Gobiernonan ta wordo pidi pa acelera e progreso di e asina yama “Sustainable Development Goals”cu ta un pakete cu a wordo introduci dor di Nacionnan Uni, cu ta tras di e actual reunion mundial riba tereno social y economico mundial.
Den esaki tambe mester anota cu Aruba ta ehecutando e programa aki, cu ta exigi financiamento mescos cu e pasonan cu mester wordo tuma den cuadro di cambio di clima.
Manera ya bisa, ora tuma na consideracion loke ta costumber prome cu eleccion, por spera cu despues di Carnaval, mundo politico na Aruba lo conoce un activacion na un momento mundial crucial cu den proximo dianan DIARIO lo sigui trece dilanti.
Situacionnan cu lo afecta Hulanda y Reino tambe y sin duda lo sostene loke politiconan den un era politico Hulandes nobo, lo bay exigi den Reino pa por enfrenta votadornan na Hulanda tambe.
Ora papia di situacionnan mundial, Aruba como destinacion turistico mester presta atencion pasobra Aruba ta depende di turista, cu ta tambe trahador of comerciante, pues dependiente di loke por afecta nan entrada.
Tur informacion ta cu por spera un campaña politico pisa pa eleccion despues cu e gobernacion actual a percura pa recuperacion di Aruba, cu mester di politiconan critico pero cu madurez cu por sostene loke ta bon pa Aruba y no solamente loke ta na bienestar politico di nan partido!
