*Tanto Influenza como Covid y algun mas
ORANJESTAD (AAN) — Boticarionan ta hopi druk e dianan aki, pa motibo cu tin hopi ciudadano cu kebrante di salud door di e diferente virus cu ta circulando, entre otro Influenza y Covid.
Recetanan pa pashent cu ta wordo manda di oficina di docter desde 8’or di mainta, por ehemplo, por keda cla te 7’or di anochi pasobra e volumen di receta ta enorme. No ta un pashent so a bay docter trempan mainta y a wak cu su docter a manda esaki online pa e botica concerni. E mesun momento tin hopi docter ta bezig ta wak pashent y ta manda receta pa recepture na un of otro botica.
Generalmente, e botica mes ta avisa e pashent ora su remedi ta cla, pero e dianan aki e boticarionan ta man yen cu no tin tempo pa haci esaki, sino cu e pashent ora ta pensa cu su receta mester ta cla, tin cu coi number y warda te ora su turno yega.
Boticanan ta cera nan porta na e ora normal, pero pa busca remedi ainda tin hende paden, wardando.
Esey ta nifica cu masha hopi hende mes ta malo cu virus y podise tin hopi hende AO. Loke si no ta parce ta e caso ta cu tin hende den cuarentena door di covid pasobra e ta wordo considera mescos cu un griep gewoon.
No obstante, por mira hopi hende ta bisti tapaboca den supermercado, den bus, cerca docter, etc., y tambe por observa turistanan cu tapaboca bisti canando den ciudad.
En todo caso, ohala tur hende na Aruba lo keda cuida pa evita no solamente Covid pero tur otro virus cu ta afectando e sistema respiratorio y digestivo (stoma-tripa), y specialmente cu nan tuma e vacuna anti influenza y si ta posible, esun di Covid, vooral personanan cu tin malesanan cronico.
