Ta bay cuminsa control severo riba esnan cu ta transporta sushi pa dump

Bureau City Inspector cu yamada di alerta --- *Uzo di lona ta wordo controla

ORANJESTAD (AAN):  Bureau City Inspector a tene un rueda di prensa pa asina trece algun punto dilanti. Vocero, Robby Rosel a referi na e situacionnan cu ta tumando lugar na Aruba en conexion cu e parti di medio ambiente.

El a splica cu nan kier a trece pa dilanti mirando cu ta den e temporada di fin di aña y un luna di November cu a habri cu hopi trabao pa e organisacion door cu e cantidad di sushedad cu tin rond di Aruba.

E PR di BCI a remarca cu Aruba ta wordo azota pa hopi sushedad den mondinan y tambe riba e careteranan. Esaki ta bin door di e personanan cu ta transporta sushi pa e dump. Nan no ta haci uzo di un lona pa por tapa e sushedadnan aki cu consecuencia cu e sushi ta bula ta cay ariba camindanan di Aruba.

Segun Robby Rosel ta mira sushi manera tayo, carton, plastic, cups, boternan di cervez, diferente articulo cu ta cay riba caminda. El a reitera cu no ta uza un lona riba e pick up of truck cu ta haci e transporte pa dump. Mester uza un lona pa ta pa esaki, pero hopi no ta haci uzo di esey.

Na e momento di e conferencia di prensa, den 10 minuut, 8 auto a drenta sin un tapa riba e vehiculo cu nan ta transporta e sushedad. Na caminda por a mira autonan di diferente compania cu ta transporta sushi tambe pa hiba dump y tampoco nan ta uza un capa.

BCI ta haci un suplica na cada un di e personanan aki pa cuminsa pone un lona riba nan vehiculo pasobra ta bay tin control severo riba esaki caminda cu Cuerpo Policial ta bay ta repartiendo boet hunto cu Bureau City Inspector, Rosel a remarca.