Minister Geoffrey Wever: --- * A pidi e sindicato di SETAR un siman pa investiga kico ta e status di cada entidad
ORANJESTAD (AAN): Diahuebs mainta, Minister di Asuntonan Economico, Comunicacion y Desaroyo Sostenibel, Geoffrey Wever a yama un conferencia di prensa caminda el a referi na e situacion cu e empleadonan di SETAR.
El a bisa cu tin varios publicacion cu a sali den algun medio di comunicacion den e ultimo dianan y gobierno no a reacciona riba e topico specifico aki, mientras cu el a reuni na algun ocasion cu e sindicato di empleadonan.
Wever a splica cu ta momento pa trece e punto di salida di gobierno den cuadro di transparencia. Den un articulo publica den un medio di comunicacion ta insinua cu gobierno lo a tuma un cierto decision pa cu SETAR y esey no ta berdad, a enfatisa.
E mandatario a sigui bisa cu esaki ta e prome biaha cu e ta dirigi su mes na prensa riba e topico aki pa splica e posicion di gobierno over di e empleadonan di SETAR.
Minister Geoffrey Wever a indica cu el a reuni cu e sindicato siman pasa riba nan peticion riba e recorte di 12.6%. A duna nan e espacio pa reuni na Bestuurskantoor pa intercambia ideanan.
"E sindicato aki ta un sindicato hopi firme. Un grupo di persona hopi profesional cu ta hiba un dialogo na un forma hopi profesional, pero firme pa nan achterban. Pero mi ta aprecia e manera con nan ta hacie, pasobra mi ta kere nan ta hendenan cu por dialoga cu nan", a bisa.
Geoffrey Wever a laga sa cu e sindicato a dirigi un carta na su persona dia 15 di November y na e carta aki a duna contesta tambe.
E sindicato di SETAR ta alega cu nan ta e prome nan cu an dicidi di contribui na e fondo di FASE basa riba e principio di solidaridad. Gobierno ta aprecia esey, a expresa.
Nan ta bisa tambe cu apesar cu nan tabata e prome nan y continuamente a sigui contribui nan tin indicacion cu na otro empresanan esaki no ta tuma lugar na e mesun forma. Esey den nan pensamento ta inhusto y esey nan a bay vocifera cerca gobierno. Nan a referi na un caso cu a sali den medionan di comunicacion over di ELMAR y algun otro empresa cu segun nan conocimento no ta dunando e 12.6% manera cu nan ta haciendo, Wever a indica.
Consecuentemente, e sindicato ta exigi pa para e recorte di 12,6% inmediato y pidi tambe pa haci cierto pago na nan.
Ora cu e minister a reuni cu nan a bisa nan cu un paro di e 12,6% no ta algo realistico pasobra e ta un condicion cu Hulanda a impone pa Aruba haya e sosten di likides y si no ta cumpli cu esaki Aruba lo ta den incumplimento cu por trece consecuencianan mas grave pa e pais. Esey no ta algo cu Aruba por dicidi, e mandatario a remarca.
E mandatario a bisa e representantenan di e sindicato cu e ta bay discuti e carta den Conseho di Minister pa señala e problemanan cu nan a vocifera.
"Nos pensamento ta cu cada empresa mester paga na e mesun forma. Dus nos ta comparti e preocupacion di e sindicato di SETAR, cu cada empresa ta suppose di duna e mesun contribucion y no por ta asina cu e empleadonan di un empresa si ta contribui completamente y otronan no", a expresa.
Na momento cu e discusion aki a surgi, ainda e minister no tabata tin e informacion si e ponencia di e sindicato di SETAR ta corecto , a enfatisa. Pesey el a bay discuti riba esaki den Conseho di Minister y pa despues bay bek cerca e sindicato.
Wever a señala cu esey ta locual el a haci den e reunion di Conseho di Minister diamars ultimo unda a dirigi un carta na e sindicato. E carta tin dos elemento importante unda ta mustra e posicion di gobierno.
Gobierno ta di acuerdo cu e ponencia di e empleadonan di SETAR cu tur empleado mester contribui na forma igual. Despues a bisa nan cu nan ta alega cu tin un discrepancia entre e contribucion. "Si esaki ta e caso, nos lo mester coregi esey", Minister Geoffrey Wever a remarca.
Na e momento aki, e documentonan cu e minister a haya diaranzon na su disposicion, esakinan ta demostra of ta mustra cu tabata tin un contribucion completo di cada entidad.
El a bisa cu tabata tin control, pero e mes no tabata tin e informacion ey den e forma completo ainda. Pa e como minister por tuma un decision pa cu SETAR, e mester tin bon conocimento di tur e hechonan y e mester tempo.
Pesey a pidi nan un siman di tempo pa por evalua y investiga kico ta e status di e contribucion di cada entidad, Minister Wever a duna di conoce.
