Caribbean Mercantile Bank  ta yuda traha desayuno pa muchanan cu tin mester

Den temporada di pandemia, mester mas ayudo --- ORANJESTAD (AAN):  Nos muchanan ta nos alegria, tesoro y futuro.

Desafortunadamente tin un cantidad creciente debi n’e pandemia presente cu ta bira inacesibel na alimentacion y nutricion primordial, den e caso aki un desayuno.

            CMB a acerca un amigo, Sr. John Fun director di Fundacion Ban Uni Man pa Cria nos Muchanan. Sr. Fun tin 20 aña caba ta sacia e demanda di provee nos muchanan atendiendo scolnan den tur bario di Aruba cu e noble causa di provee un desayuno pa nan, tur dia di siman.

            Pa varios aña caba CMB ta aporta financieramente na e causa aki, pero a dicidi di expande su contribucion y asina inclui e Persooneels Vereniging di CMB.  A bini hunto pa planea y coordina pa asina crea un experiencia cu ta contribui mas directo ainda na e bon causa aki.

            Asina aki un atardi den siman CMB su General Managing Director Sr. Paul DeWolfe hunto cu directiva di CMB Personeels Vereniging Sr. Ruben Kock y Sra. Haydee Boekhoudt a encontra na cas di Sr. Fun pa un atardi di experiencia, unda a prepara desayuno pa 30 mucha p’e siguiente mainta.

            CMB a priminti di sigui cu e programa aki, mirando e demanda y gastonan creciente, y a pone su staff disponibel pa coordina futuro plannan. E biaha aki CMB a haci un donacion di Afl. 20,000.00 na e fundacion.

            Asina aki tambe Sr. Fun y su distiguida esposa a gradici CMB pa su interes y aprecio p’e trabou aki, y ta keda man habri pa futuro eventonan.

            Nos mester proteha y alimenta nos muchanan cu tur cos cu ta positivo. Nan ta e futuro di nos sociedad y pais. Ban cuida nos muchanan; Ban Uni Man pa Cria nos Muchanan.