Ta bay costa como 250 mil Florin pa reemplaza e vloer kibra den Centro Deportivo Betico Croes

Gerry Franca di ASU - ORANJESTAD (AAN): Casi un luna pasa, DIARIO a trece e informe dilanti con e proceso di usa Centro Deportivo Betico Croes como centro di vacunamento,

a pone cu hendenan subi e piso special cu nan zapato y a pone stul tambe, y tur hende por a mira con e piso special polyurethane of di resin cu Centro Betico Croes tin, a keda despues cu pa varios siman largo tabatin stul di plastico riba nan.

   E pianan di e stulnan aki a literalmente ‘coba’ den e piso polyurethane of resin aki, creando buraco na varios lugar den e piso cu tin consistencia un tiki riba rubber.  Hopi ta corda con basta placa a wordo hinca pa Sporthall di Santa Cruz a haya e vloer special aki pa haci deporte.  E tabata ideal pa weganan di basketball, volleyball, zaalvoetbal, hasta Karate y Taekwondo.

   Ainda DIARIO ta corda con na comienzo, pa bo por a subi e cancha aki, bo tin di haci esey sea cu keds of meya special, pues nada cu por daña e vloer.

   Aki por mira claramente con el a keda despues di e dianan di vacuna unda miles di hende a para largo den rij pa asina keda eyden cu promedio di 30 minuut largo sinta pa haya e vacuna y warda un rato despues.

   CAMBIA CADA 10 AÑA:  Lo bay haci algo pa drecha e piso?  Segun Gerald ‘Gerry’ Franca di Aruba Sport Unie (ASU), e piso na Centro Deportivo Betico Croes a wordo instala alrededor di aña 2002, pues e tin 18 aña.  E pisonan aki ta wordo instala cu intencion pa wordo reemplaza na un promedio di cada 10 aña.  Esey ta bin debi na e.o. cu e piso ta pasa den calor y tambe frieu, y ta deteriora y perde su consistencia original.

   Desde cu a cuminza usa e lugar pa vacuna pueblo, na momento cu pone stul riba dje, e ta cuminza pega.  ASU a haci estudio y busca varios oferta pa cambia e piso.  Segun Franca, nan a haya 3 oferta di diferente estilo di piso, y nan a presenta esaki na e.o. DVG, DOW, y Gobierno, pero sinembargo tin di bay warda.  Pasobra aworaki keto bay Gobierno tin intencion di sigui usa Centro Deportivo Betico Croes pa duna vacuna te dia 31 di Juli 2021, y despues di esey lo keda wak si lo nan lo keda mantene, of lo entrega e sporthall.  Segun Franca, na momento di entrega, mesora ASU lo cuminza haci e trabao.

   E trabao lo dura 1 luna pa cambia e piso.  Pasobra ASU a indica cu ya tin confirmacion cu varios actividad deportivo lo bin na fin di October, pa asin e lugar por sigui draai atrobe como un centro di deporte.

   Pero nan ta compronde cu salud ta bay prome cu tur cos, y esey ta e motibo cu a duna DVG pa asina sigui duna vacuna na pueblo.  Riba fin di siman aki mes, Gerry Franca a nota cu e Youth Vacunathon, e tabata un resultado basta bon.  Hopi hende den rij pa tuma e vacuna.

   PISO COSTA 250 MIL:  E piso di Centro Deportivo Betico Croes tin di wordo cambia, pero ta wardando te ora cu e centro finaliza di funciona como lugar di vacuna, pa asina cuminza cune.

   Manera a ser menciona caba, tin tres diferente oferta, pa 3 diferente calidad di veld.  Pero ASU no ta discuti pa escoge uno, pues ta djis busca uno.

   El a indica na DIARIO cu e lo costa 250 mil Florin pa cambia e piso completo.  E placa ey ta algo cu ASU no tin, pero lo tin di sali di presupuesto di DVG, DOW, y Ministro di Deporte.  Awor ta wardando un contesta di nan, pasobra tin presupuesto poni un banda na vacuna, y e campaña pa vacuna pueblo ta cay bao di un ‘caso di emergencia’ y mester a biba cune.

   Hecho ta cu na final, Centro Deportivo Betico Croes ta spera di lo tin un piso adecuado bek pa deporte sigui bay dilanti den e lugar.