SVT tin mester di hoben femenino pa inscribi pa e di dos grupo

Coordinadora Jessica Ras:

ORANJESTAD (AAN) – Trayecto Formacion Social (SVT) ta bezig cu e grupo-1 di hoben femenino pa cual no tin cupo mas, pero su coordinadora Jessica Ras, den un entrevista cu DIARIO, a duna di conoce cu tin oportunidad pa un  di dos grupo, cu tin inscripcion habri.

            Ras a bisa cu ya caba nan a cuminza cu instruccionnan pa mucha muher den  edad di 17-24 aña, y e ta haci un yamada na esnan interesa pa bay aplica mas pronto posible, pa asina por drenta den e seleccion di e grupo.

            E interes ta bayendo bon, pero mester di mas inscripcion. A base di actividad ta wak si por hinca nan den e grupo.

            Tin un grupo di 25 hoben cu ta bay evalua wak si por drenta den e trayecto. Jessica Ras kier a encurasha tur mucha muher, of e mamanan cu tin yiu cu no ta ocupa aworaki of cu kier un reto nobo, pa probecha e oportunidad grandi aki cu tin pa nan.