Ploegnan di Bureau City Inspector a haci trabao completo di limpieza di Parke Mabon

Robby Rosel, vocero:

ORANJESTAD (AAN)—Den entrevista cu e Relacionista Publico di Bureau City Inspector, el a comenta cu for di dia 14 di Februari ultimo, BCI a ricibi un melding via FIXI, cu tin hopi sushedad den e Parke Mabon.

            Dos dia despues cu e melding a drenta BCI a manda un ploeg y a constata cu di berdad e lugar tabata na werki, yen di sushedad, matanan cu a crece masha grandi mes cu a rekeri di hopi trabao, y di biaha nan a tuma contacto cu e Fundacion Facilidadnan Deportivo, unda cu a palabra cu BCI ta haci e parti di limpieza.

            Rosel a cuestiona cu ora tur e trabao a tuma lugar, a cuminza cu yen comentario via prensa cu ni un hende ta worry cu e parke. El a subraya cu e parke aki no ta di indole publico pero e ta cay bao di Facilidadnan Deportivo di Lotto pa Deporte.

            Na e momento ey a dicidi di sinta na mesa, papia y delibera y tur esaki a tuma tempo pero a yega na un acuerdo cu BCI lo patrocina e parti di limpieza, mirando cu e ta parti di gobierno di Aruba. A dicidi cu City Inspector conhuntamente cu Minister Ursell Arends. “Nos lo bay cuminza laga e seis ploegnan di BCI cuminza haci e parke aki limpi. Trabaonan a inicia haci limpieza, corta mata, haci e tennis court limpi, etc., y e Fundacion y Minister Ursell Arends a pone baki disponible, pero mayoria di esakinan ta cay bao e Fundacion Facilidadnan Deportivo”, Rosel a reitera.

            E trabao aki a termina pa BCI haci e traspaso bek na e doño di e tereno, esta Fundacion Facilidadnan Deportivo di Lotto pa Deporte, bao guia di señor Pierre Croes, kende a haci un bishita na Bureau City Inspector y a gradici nan director, señor Roy Croes, pa e bon trabao cu e ploegnan a haci.