NGO local ta refleha riba e Dia Mundial di Telecomunicacion

ORANJESTAD (AAN): E grupo local di Rainbow Warriors International, cu ta un NGO na Aruba, a elabora riba e recien observa Dia Mundial di Telecomunicacion y di e Sociedad di Informacion

tin como obhetivo concientizacion riba e posibilidadnan cu e uso di Internet y otro tecnologia di informacion y comunicacion (ICTs) por ofrece sociedadnan y economia y tambe pa promove inclusion digital.

   Desde 1969 ta celebra Dia Mundial di Telecomunicacion riba 17 di mei pa marca e creaccion di International Telecommunication Union y pa conmemora e firmamento di e promer Convenio Telegrafico Internacional na 1865.  Na november 2005, e Cumbre Mundial riba Sociedad di Informacion (WSIS- World Summit on the Information Society) a pidi Asamblea General di Naciones Uni pa declara 17 di mei como Dia Mundial di Sociedad di Informacion pa yama e atencion riba e importancia di tecnologianan di informacion y comunicacion (ICTs) y e numeroso temanan relaciona cu e sociedad di informacion plantea pa WSIS.

E Asamblea General na maart di 2006 a adopta un Resolucion stipulando cu Dia Mundial di Sociedad di Informacion lo ser conmemora riba 17 di Mei.

   Na november di 2006, den un conferencia di ITU na Turkia a dicidi pa combina e dos celebracion den un solo Dia Mundial di Telecomunicacion y di Sociedad di Informacion riba 17 di mei.

   Tema di 2023: Empodera e paisnan menos desaroya mediante tecnologia di informacion y comunicacion

Den e ultimo decada e tema di conectividad a bira mas complica y exigente. Haci tur hende tin acceso na Internet so ya no ta suficiente. Un conectividad eficiente pa un y tur den un forma sigur, satisfactorio, enrikesidor, productivo y pagabel a bira e imperativo nobo.

   Pa e paisnan menos desaroya (Least Developed Countries-LDCs) esaki ta un reto grandi.

   Pesey e aña aki Dia di Telecomunicacion y Sociedad di Informacion tin como tema “Empodera e paisnan menos desaroya mediante tecnologia di informacion y comunicacion”.  E International Telecommunication Union ta haci un yamada na sectornan publico y priva pa compromete nan mes pa yuda crea conectividad universal y facilita transformacion digital den e paisnan menos desaroya atrabes di su programa Partner2Connect Digital Coalition.

   Pa logra esaki entre otro den e cuadro di e Obhetivonan di Desaroyo Sostenibel (SDGs), mester enfoca riba e Obhetivo 9, esta Industria, Innovacion y Infrastructura.

   E tema di e aña aki por ser aplica generalmente pa tur pais ora nos tuma en cuenta e metanan:

9.1 Desaroya infrastructura confiabel, sigur, di calidad, sostenibel y resiliente, incluso infrastructura regional y transfronterizo, pa sostene desaroyo economico, bienestar humano cu un enfoque riba acceso equitativo y pagabel pa un y tur

9.5 Aumenta investigacion cientifico, mehora capacidad tecnologico den tur sector industrial den tur pais, en particular den e paisnan menos desaroya pa 2030 y encurasha innovacion y substancialmente aumenta e cantidad di trahador investigador den sector publico y priva y inversion den research y development di sector priva

   E situacion na Aruba:  Na aña 2020 Staten di Aruba a pasa e Mededingingsverordening  (AB2020 No.103) pa crea e Autoriteit Markt en Consument, un exigencia poni den Landspakket pa Aruba.

E autoridad cu lo carga e nomber Aruba Fair Trade Authority a ser presenta pa Minister Geoffrey Wever 19 september 2022 den un reunion publico di Staten.

   Segun e mandatario, “cu e organo di AFTA, Aruba tambe ta forma parti di desaroyo internacional den e area aki. AFTA lo trece cambionan importante y structural pa nos economia y pa tur ciudadano den nan rol como consumidor”.

   Competencia liber y sin limitacion pa tur compania na un pais ta stimula inversion y desaroyo di comercio, tambe mihor calidad di producto y servicio. Esaki ta nifica cu na Aruba, conforme e tratado Europees Verdrag voor de Rechten van de Mens (EVRM), su articulo 10, cu ta regula acceso, distribucion y transmision di informacion mediante cualkier medio di comunicacion hunto cu SDG 9 porfin lo por duna contenido na e liberalisacion di e mercado di servicionan di telecomunicacion na Aruba, ya cu esaki ta e mandato di e Aruba Fair Trade Authority, esta garantisa competencia husto den mercado di telecomunicacion y tur servicio di e sociedad di informacion.