SVb a ricibi apoderacion oficial pa aumenta e reparatietoeslag pa pensionado cu 250 Florin

Ministro Geoffrey Wever:

ORANJESTAD (AAN):   Diaranson mainta ministro Geoffrey Wever conhuntamente cu coleganan ministro di Gabinete AVP-Futuro, Sr. Mike Eman, Sra. Gerlien Croes, Sra. Mervin Wyatt-Ras y Sr. Wendrick Cicilia a haci entrega oficial di e decision di Conseho di Minister, cual ta autorisa SVb pa aumenta e reparatietoeslag pa tur pensionado cu AFL 250,- riba nan cuenta mensual, desde 1 di mei 2025. Ricibi pa director di SVB, Sr. Edwin Jacobs, el a declara cu esaki lo wordo implementa "a pia de la letra". 

Ministro Geoffrey Wever satisfecho cu esfuerzo di trabou ta duna resultado inmediato.

            Segun Ministro di Finansa, Economia y Sector Primario, Geoffrey Wever, "esaki ta un alivio importante y na ora pa nos grandinan". El a expresa su gratitud na e tur coleganan cu a haci un esfuerso extraordinario pa e gabinete por a logra presenta e cambionan necesario den e presupuesto cual a sirbi como fundeshi pa por logra e paso importante aki.

            “E cambio den presupuesto 2025 no tabata fasil, pero danki na e trabou tecnico y dedicacion di nos ekipo, nos por a logra un manera di duna e pueblo un aumento real sin sali foi e cuadro financiero responsabel. Un surplus no ta di ningun gabinete, ni di ningun partido; e ta di e pueblo cu ta traha duro y paga belasting," Ministro Wever a declara firmemente.

            Ministro Geoffrey Wever a reitera cu gobierno di Aruba ta compromete pa sigui traha riba solucionnan cu tin impacto directo riba e bienestar di e pueblo Arubiano. E paso aki ta solamente e comienso di un enfoke integral y sostenibel pa mehora e poder di compra di nos comunidad.