ORANJESTAD (AAN): Diamars mainta a tuma lugar apertura di Huisartsenpost (HAP) na ImSan.
Durante un conferencia di prensa director di ImSan Joel Rajnherc a trece dilanti cu e dia tabata uno di celebra cu despues di hopi aña y hopi reto, toch a yega na establece un HAP na San Nicolas, na ImSan.
“Mi no ta bay den detaye, pero mi ta gradici tur e stakeholders pa haci esaki bira un realidad”.
Na prome lugar nos tin cu duna masha danki na e miembronan di AZV cu toch di tur manera a stimula pa esaki tuma lugar.
Di dos nos tin cu gradici HAVA, cu ta eherce e ofishi na HAP y di tres nos ta gradici cuido primario cu a yuda percura cu e grupo di asistentenan cu lo yuda akinan lo wordo bon guia, segun Rajnherc.
Dr. Joaquin van Trikt tambe a hiba palabra y a bisa cu a sinta cu AZV pa basta tempo papiando riba diferente ley y despues a logra di cera un convenio pa lanta un asina yama ‘zorginstelling’ cu ta cay bao di ‘eerste lijn’ y ta wordo maneha pa docternan di cas.
Awor cu tur cos a wordo regla debidamente, por a habri e HAP.
Director di AZV Edwin Jacobs na su turno a bisa cu AZV ta sumamente contento cu e logro aki, despues di haci hopi esfuerzo durante añanan largo.
“Ta bunita pa wak con a pone tur e schoudernan hunto pa loke ta e retonan, pa awor porfin logra habri e huisartsenpost na ImSan”.
Cu e HAP nos ta bay percura pa continuidad pa cuido di docternan di cas, despues di oranan normal di trabao di docternan di cas.
Esaki ta conta tambe pa dianan di fiesta, segun Jacobs.
E HAP na ImSan ta bay yuda baha e presion di HAP na Horacio Oduber Hospital y tambe di Spoedeisende Hulp, segun e director di AZV.
Durante e conferencia di prensa minister di Salubridad Mervin Wyatt Ras a expresa palabranan di pabien na tur esnan cu tabata envolvi cu e logro grandi aki.
E mandatario di e gabinete nobo a sigui bisa cu e sa cu e curazon di Dr. Rajnherc y curazon di tur esnan cu ta trahando na ImSan y ta bay traha na HAP ta na e lugar corecto.
{gallery}San Nicolas awor tambe tin su Huisartsenpost (HAP){/gallery}
