Xiomara Maduro durante tratamento di Presupuesto 2025:
ORANJESTAD (AAN): Den su discurso na final di e tratamento di Presupuesto 2025, Minister Gerlien Croes a lansa un acusacion falso contra ex Minister di Finansa y awo Parlamentario Xiomara Maduro. Segun Gerlien, e cambio fiscal cu ex Minister Maduro a haci pa baha loonbelasting tabata contra ley, y pesey e hecho cu Parlamento di Aruba ta aproba e Presupuesto 2025 na forma unanime, lo yuda pa ‘scapa Xiomara’, ya cu ta legalisa e desicion contra ley tuma pa e ex mandatario di finansa.
Pa contradeci e acusacion falso aki, Parlamentario y ex Minister di Finansa Xiomara Maduro den un punto di orden a splica cu e cambio fiscal haci ta legal. El a splica cu pa ley e Minister di Finansa via un Decreto Ministerial por haci cambio den tarifa y esey ta locual corectamente el a haci tambe pa beneficia un gran parti di e Pueblo trahado cu ta paga belasting.
Parlamentario Xiomara ta haya lamentabel cu Minister Gerlien como un hurista di profesion, ta lansa acusacion infunda asina sin lesa y compronde kico ley ta stipula. Di e manera aki Gerlien como mandatario y hurista ta ‘perde cara’ como un profesional y ta mustra mas manera un hende no educa cu ta djis lansa mentira pa haya acohida.
Parlamentario Maduro ta di opinion cu si Minister Gerlien no tabata desea pa e clase media di Aruba haya un alivio fiscal, e mester a tuma e corahe di pidi su colega Wever di Finansa pa cambia e desicion. Algo cu cualkier mandatario na tino no lo haci. Sinembargo tabata tristo si pa mira cu ningun di Gerlien su colega ministernan cu ta hurista, Wever, Eman y Dowers, no a purba sikiera pa scapa Gerlien di ‘perde cara’ lansando acusacion sin base contra ex Minister di Finansa Maduro.
