Supermarket grandi na Merca ta cla pa bo haci compras cu un garoshi smart

ORANJESTAD (AAN): E cadena di supermarket mas grandi na Merca, esta Kroger Supermarkets ta trahando pa cuminza lanza un garoshi di compra cu ta ‘smart’ y cu lo haci uso di e inteligencia artificial (AI), desaroya pa e compania Caper Inc. di New York.

   Caper a anuncia cu nan a cuminza traha hunto cu Kroger Co. pa desaroya e garoshi aki cu nan ta yamando “KroGO”.

   E siman aki nan a divulga cu e garoshi aki a pasa temporada di prueba na un Supermarket di Kroger na Cincinnati (Ohio) desde October 2020.  E tecnologia ta permiti e cliente pa scan e articulonan y paga directamente via e garoshi, eliminando e necesidad di bay para den rij pa asina paga un cashier.

   E garoshi KroGO ta ofrece clientenan un experiencia di compras sin estorbo unda nan mes ta scan e articulonan y paga, tur cos na e garoshi mes.  Awor nan plan di expansion ta wordo planea segun reaccion ricibi di clientenan y di empleadonan mes.

   E garoshi di e compania Caper, ta usa inteligencia artificial y machine learning pa scan e productonan e momento cu e cliente ta pone nan den garoshi, y cu tin tambe un balans den dje pa conta e articulonan (fruta y berdura) cu ta wordo bendi segun peso.  Un pantaya cerca di e man di garoshi ta dunabo un bista di tur loke bo tin den e garoshi y e costo di nan tur.  Banda di dje tin un terminal pa ricibi carchi di debito of credito pa asina bo paga eynan mes.  E cliente tin di pone e articulonan nan mes den saco, y unavez cu e pago keda cla, nan por bandona e tienda.

   Ademas di mustrabo e productonan cu ta hinca den garoshi, e pantaya por mustrabo recomendacion kico pa cumpra, y ofertanan promocional tambe, y hasta yudabo mustrabo unda tal producto ta poni, segun Caper.  Clientenan por scan nan carchi di miembro tambe directamente den e garoshi.

   Caper a splica cu nan garoshi smart no ta rekeri pa Supermarketnan haci cambio grandi of un overhaul completo.  Nan por start mesora.  Y awor cu e pandemia, hopi cliente no kier para dilanti un cashier pa haci pago, y pesey tecnologia pa checkout autonomo ta hayando mas y mas demanda.