Minister Dangui Oduber a anuncia renobacion di stadion Guillermo Prospero Trinidad

ORANJESTAD (AAN): Diamars mainta Minister di Deporte sr. Dangui Oduber tabata den un conferencia di prensa cu a tuma lugar na stadion di Guillermo Prospero Trinidad na Dakota.

Aki e mandatario conhuntamente cu e Presidente nobo di Arubaanse Voetbal Bond (AVB) sr. Randolf Lacle a anuncia cu lo bay cuminsa cu trabaonan di renobacion na e stadion den Dakota.

   Esaki despues cu diabierna ultimo a aproba e presupuesto 2021 den Parlamento, di esaki Ministerio di Deporte a presupuesta 1.5 miyon Florin pa renoba e prome fase di e stadion asina Minister Oduber a trece dilanti.

   Minister Dangui Oduber a recorda pueblo riba e hecho cu ya pa varios aña caba e stadion di Guillermo Prospero Trinidad mescos cu otro facilidadnan no a conoce un renobacion y consecuentemente a conoce un deterioro. Un di e consecuencianan ta cu Aruba su seleccion nacional no por hunga weganan international na cas como cu e stadion a worde desaproba pa FIFA.

   E mandatario a splica cu su maneho semper tabata basa riba mehoracion di e infrastructuranan di diferente veld. E ta lamenta si cu Fundacion Lotto Pa Deporte a laga hopi di desea den esaki, asina mes na maneranan creativo e mandatario a sa di busca fondonan necesario pa yuda difirente fundacionnan rond Aruba segun e mandatario. Minister Oduber a sigui bisa cu e ta contento di anuncia cu stadion di Guillermo Prospero Trinidad lo haya un renobacion completo.

   E renobacion di Compleho Deportivo Guillermo Prospero Trinidad lo bay den fase, e pome fase lo pone yerbe artificial (artificial turf) nobo, lo renoba e camerinnan y lo renoba e parti tribunal. Den e di dos fase lo bay bay cambia e iluminacionnan di e veld y renoba e “atletiek band”. E proceso di destaho publico ta engarga pa e departamento di DOW y lo start pronto, asina e minister a declara.

   Presidente di AVB a declara cu si tur cos cana segun plan ya pa maart di aña 2022 lo por tuma lugar e prome wega internacional riba e veld. E renobacion aki mester a tuma lugar pa Aruba por cumpli cu e rekisitonan poni pa FIFA. Cumpliendo cu esakinan ta haci cu AVB lo por ricibi fondonan adicional for di FIFA, asina e mandatario a duna di conoce.

   Minister Dangui Oduber ta sumamente contento cu pronto Aruba su seleccion nacional lo por hunga weganan internacional na Aruba mes. E ta un noticia positivo pa deporte di futbol y positivo pa Aruba cu nos ta bay haya un stadion completamente renoba back. Minister Oduber su compromiso cu deporte ta continua.