ORANJESTAD (AAN): Aruba Airport Authority N.V. (AAA) su Wings of Hope (WoH) ta orguyoso pa anuncia cu Colegio Cristo Rey ta e ganador oficial di e prome Energy Champion Competition.
Como parti di WoH su meta di “Affordable and Clean Energy”, WoH recientemente a organiza e prome Energy Champion Competition pa scolnan primario. WoH a extende un invitacion na scolnan primario pa participa den un “energy sustainability challenge” pa concientiza y crea curiosidad bou di e studiante- y maestronan riba iniciativanan sostenibel.
Scolnan cu a participa a entrega un plan pa reduci nan scol su consumo di energia cu 20% den un budget specifico. Tur plan a worde evalua door di un panel di huradonan basa riba un criteria estricto.
Wings of Hope workgroup, representa door di Christine Kaarsbaan-Leo, Armand Kelly y Angeline Flemming di AAA, a presenta e premio ganador Diabierna Juli 23, 2021 na Colegio Cristo Rey. E “Energy Champion School” lo ricibi 20.000 Florin pa ehecuta nan plan pa reduci consumo di energia. WoH a keda sumamente impresiona cu cada plan di e scolnan cu a inclui nan investigacionan haci riba e topico, un bista detaya di nan budget y tambe e creatividad pa ehecuta nan plan.
WoH ta gradici tur scol cu a participa den e prome Energy Champion Competition y cu lo sigui inclui studiantenan y e comunidad di Aruba den proyectonan den futuro, y na mesun momento creando un mihor futuro sostenibel pa nos tur.
