Sumamente exitoso tabata e recien Karaoke Festival di Aruba Lions Club

ORANJESTAD (AAN): Diasabra 29 di Maart den China Club yen a tuma lugar e di dos festival di Karaoke di Aruba Lions Club.

Un total di 26 participante a subi escenario pa asina deleita e publico masha entusiasma un tremendo show.  Temanan na Spaño, Ingles, Papiamento den genero salsa, merengue, ranchera , balada y mas.

   E MC di anochi tabata Julissa Boekhoudt, kende a sa di anima e anochi aki den gran forma.  Show a start unda tur participante a canta Himno di Aruba den  forma di Karaoke.  Tambe presidente di Aruba Lions Club Sr. Danny Maduro tambe a hiba palabra pa gradici e participantenan pero tambe e publico presente.

Show a cuminsa y un tras di otro cada cantante a subi y deleita e publico.

   George Winterdaal encarga di e lidera e proyecto aki tambe a hiba palabra y a gradici tur persona y a prepara tur persona pa un show special. Como Intermission e algun di e propio miembronan di Aruba Lions Club a duna un presentacion den un sublime medley cu a ricibi na final un gran aplauso di e publico.  Tambe cantantenan Xennon Daal y Jetsenia Martinus a deleita tur hende cu nan themanan cu a arasa den Carnaval.

   Na final e huradonan Nicole, Soledad y Jelise cu conteo di Shemine como Presidente di Hurado a duna e resultado final .  Tur participante a ricibi nan medaya y un Goody Bag di Setar.

   Best Dress a bay pa Jessy Gonsalves,  Popular a keda pa Jasmin Tromp, Rookie a bay pa Suyenne Dania

   Na di 5 lugar a keda Jhonny Gerritsma, di 4 lugar a keda Gilberto Boerleider, di 3r lugar a keda Julien Dijkhoff, di 2 lugar a bay pa Emilia Stein y Ganadora Absoluto a bay pa Olga Tromp.

   Aruba Lions Club kier a yama danki na tur patrocinador y colaborador.  Tambe danki na tur Lions Member cu a yuda durante e evento y na caminda pa e evento.

   Y sigur na tur esnan cu a bay apoya e cantantenan, sa cu boso aporta pa a cumpra e ticket aki ta bay back den nos comunidad.  Keda pendiente pa e proximo evento di Aruba Lions Club.