Studiantenan di Facultad di Hospitalidad y Turism ta organisa varios evento dirigi na comunidad

ORANJESTAD (AAN):  Studiantenan di Universidad di Aruba (UA) facultad di Hospitalidad y Turismo (FHTMS) como parti di nan curso di “Events Management” ta

organisando ocho proyecto pa comunidad den luna di april y mei.

             Mision di nan facultad ta pa prepara studiantenan cu e conocimiento y abilidad pa eherce e rol di lider den comunidad y pa ta conciudadanonan di caracter den e industria global di hospitalidad y turismo.

            E proyecto di servicio comunitario ta un ehercicio cu ta permiti e ocho (8) team nan di cinco (3-4) studiante aplica e conocimiento acumula di e teoria pa planea, organisa, y ehecuta un evento special pa recauda fondo pa un instancia den nos comunidad.

            E meta di e proyecto “Community Service Project: Special Fundraising Event” ta pa desaroya e conocimiento y abilidadnan di e studiantenan, pero mas aun motiva y involucra nan pa duna bek na nos comunidad.

            Den e auditorium di UA e gruponan a presenta nan idea / concepto na representantenan di Aruba CEDE Aruba, ECO DMS y miembronan di diferente instancianan cu nan lo yuda. Nan presentacion a inclui informacion di e instancia, motibo dikon a scohe esaki, tipo di evento, con lo mercadea e evento, recurso cu mester pa ehecuta (voluntario, cuminda, fondo, y mas). E meta tras di presentacion tawata pa nan ricibi feedback ariba nan evento y pidi sosten pa por ehecuta esaki.

            “Cu e projecto aki kier logra pa e studiantenan pone den practica locual cu nan a siña durante e semester. Organisa un evento no ta algo facil, ta rekeri abilidadnan manera flexibilidad, creatividad, originalidad, bista pa detaye, initiativa, maneho di tempo, comunicacion, resolucion di problema y mucho mas. Como meta adicional tin pa purba stimula mas voluntario pa nos comunidad.” Sra. Jo-Anne Croes docente di e curso ta subraya.

            E facultad completo ta invita pueblo di Aruba pa bishita e diferente eventonan y sostene nan studiantenan cu ta trahando duro y di curason♡ pa nos comunidad.

April 23:

Impact Café: School Edition at EPI organized for Heart Centered Leadership Foundation – Team Leader Cristian

April 23 & 24:

Snack Box Sale for Donkey Sanctuary – Team Leader Jose

April 27:

Workshop Virtual | Ban Cosecha cu Hof'i Bario Rancho! For Stichting Rancho – Team Leader Elena

Mei 1:

Snack Box Sale for Luna Foundation – Team Leader Elselyn

Mei 7:

Online Raffle for Fundacion Pa Nos Comunidad (FPNC) – Team Leader Jayen

Mei 8:

Online Gaming Event for Telefon pa Hubentud – Team Leader Kiwar

Mei 8 & 9:

Food & Toy Drive for Casa Cuna, Imeldahof & Centro Famia Criansa – Team Leader Michelle

Mei 9:

Online Raffle for Fundacion Respetami – Team Leader Jilianne

            Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. Pa mas informacion di nan programa por bishita www.ua.aw of via facebook @UA.FHTMS