ORANJESTAD (AAN): Pa conmemora ‘Earth Day’ AHATA ta distribui su guia di ‘Environmental Best Practices’ pa nan 123 companianan miembro, cu e meta pa motiva mas
compania pa implementa practica di sosteniblidad.
Como un isla chikito den desaroyo, Aruba ta altamente vulnerabel na aumento di nivel di lama a causa di e fenomeno conoci como ‘Global Warming’ of cambio di clima. AHATA su comision di medio ambiente a compone un guia di miho practica basico pa medio ambiente. E documento ta enfatisa e importancia di integracion di practicanan pa proteccion di nos medio ambiente y pa un comunidad mas sostenibel.
E guia ta ofrece diferente recomendacion basico riba conservacion di electricidad, reduccion di consumo di awa, maneho di desperdicio, participacion di comunidad, y respet pa nos naturalesa. E practica por worde introduci den negoshi di cualkier tamaño.
AHATA su comision di medio ambiente a worde funda door di Aruba su pionero di sosteniblidad, Ewald Biemans, aproximadamente binti aña pasa. E comision ta consisti di boluntario di companianan miembro, sector priva, y fundacionnan. Nan meta ta pa crea interes pa e 4 R-nan: Reduci, Reusa, Recicla y Reutilisa den e sector comercial, gobierno, y publico en general.
Un gradicimiento special ta bay pa Vanessa Rasmussen, presidente di e comison y Bucuti & Tara Beach Resort su Sustainability Manager, Nathaly Stanley pa lidera e produccion di e ‘Environmental Best Practices’.
AHATA tin speranza cu su miembronan ta tuma iniciativa pa bira embahador ambiental den nos comunidad door di implementa practicanan sostenibel y conhuntamente combati e menaza iminente di cambio climatologico.
