Nigel Matthew: “E trabao cu mi a haya tanto elogio pe no ta mi so a hacie”

ORANJESTAD (AAN) – Meneer Nigel Matthew, ex-director di Colegio San Nicolas, cu evidente emocion a hiba palabra, en conexion cu e ceremonia oficial, di cambio di

nomber di e scol pa “Colegio Nigel Matthew”.

Matthew a cuminza expresando: “Mi ta haya e cos di mas normal den bida, ora bo scoge un profesion, cu bo lo hacie cu pasion, cu full bo curazon y semper sea abierto pa conseho di otronan. E trabao cu mi a haci, cu mi a haya tanto elogio pe, mi no por a logre mi so; mi no a hacie mi so. Mi a traha semper cu un bon team, y mester bisa cu e honor aki tambe, mi kier comparti cu nan. Tur cu a yuda mi pone un fundeshi pa e scol por a bira realidad”.

Matthew ta kere cu ora un hende ta bezig haciendo su trabao e no ta conciente kico e ta haciendo. Esaki el a expresa door di e perfil cu coleganan a crea di dje. “Pero tanten hacie cu un huicio sano, y cu un bon curazon loke bo haci ta bon. No ta tur ora mi por a tuma e miho decisionnan, pero mi tabata den e posicion cu mester a hacie.

“ Para akinan, tin tanto cos ta pasa riba mi cabes, y personanan cu mi ta bisa ‘caramba’ mi mester ta agradecido cu mi tabata tin nan den mi bida y cu a yuda mi pa mi yega caminda mi ta akinan, y cu mi por aprecia tur cos cu mi por a logra” Nigel Matthew a indica.

Cu voz kibra, Nigel Matthew a expresa:
Un persona cu mester ta aki ta mi casa Jane.  Pero manera tur hende bisa ami, e tey! E ta akinan cu nos”. Pues, no solamente e tabata un bon casa y mama di su yiunan, pero el a yude cu hopi cos, y cu e no tey e tin cu acepta. Cordando su señora cu hopi sentimento, Nigel Matthew a conclui su relato.