ORANJESTAD (AAN): Mas cu 170 studiante di Colegio Arubano y Colegio Nigel Matthew a papia y debati entre nan tocante e
temanan aki durante un actividad special di Prinsjesdag, organiza pa e Vertegenwoordiging van Nederland in Aruba (VNO). Kico Prinsjesdag ta nifica pa Aruba y cua temanan for di e politica Hulandes ta afecta tambe e otro paisnan dentro di Reino?
E reunion a tuma lugar dia 22 di september na Paseo Herencia, caminda Cas di Cultura ta situa temporalmente.
Un siman despues di Prinsjesdag na Hulanda, e studiantenan a haya prome un splicacion tocante e Troonrede, e Miljoenennota y e Rijksbegroting. Hefe di e Vertegenwoordiging van Nederland in Aruba, Vincent Storimans, a hiba nan den e partinan mas importante y a trata e nificacion di Prinsjesdag pa Hulanda y pa e paisnan dentro di Reino.
Tambe a trata e presupuesto di Aruba. Jurista y ex-studiante di Colegio Arubano Hellen van der Wal a conta e studiantenan con un presupuesto ta wordo prepara y cua partidonan ta envolvi den e proceso. Asina nan a haya mas comprension di e structura politica y administrativo di Aruba y di e rol di Staten den e aprobacion di e presupuesto.
Despues tabata tempo pa e debate. Studiantenan di Colegio Arubano y Colegio Nigel Matthew a debati den grupo tocante diferente temanan social y político actual. Nan a haya e encargo pa defende un punto di bista, tambe ora esaki no tabata coincidi cu nan mes opinion. E debatenan a wordo evalua pa un hurado cu tabata consisti di ex-gobernador di Aruba Fredis Refunjol, Hellen van der Wal, Vincent Storimans y Matthijs van Beusekom (senior beleidsmedewerker di VNO).
VNO y e hurado tabata hopi impresiona cu e participacion activo y entusiasta di e studiantenan!
