Durante High-Level Week na New York
ORANJESTAD (AAN): Minister di Husticia, Integracion, Transporte Publico y Energia, mr. drs. Arthur Dowers, ta actualmente na New York como parti di delegacion di Reino Hulandes durante High-Level Week di e di 81 Asamblea General di Nacionnan Uni.
Durante e prome dia di su programa, Minister Dowers a participa como miembro di delegacion di Reino na un reunion bilateral, caminda clima tabata e tema principal riba agenda.
Den e cuadro aki, Minister Dowers a reuni cu Klimaatgezant IGG Jan Versteeg, pa atende cu desaroyonan y retonan den area di clima y e importancia di tene e realidad di islanan chikito manera Aruba presente den e dialogo internacional.
Pa Aruba, cambio climatico no ta solamente un tema internacional, pero un realidad cu tin consecuencia directo pa nos isla. Como un Small Island Developing State, nos vulnerabilidad ta diferente y mester tene cuenta cu e aspecto aki den e discusionnan y solucionnan cu ta wordo desaroya.
Participacion durante High-Level Week ta brinda Aruba e oportunidad pa, como parti di Reino, sigui fortalece dialogo y cooperacion internacional riba temanan cu tin importancia directo pa futuro y desaroyo di nos pais.
