Representando Fundacion Telefon pa Hubentud:
ORANJESTAD (AAN)- Señor Shurman Milliard di Fundacion Telefon pa Hubentud- 131, a sali pa Colombia, pa atende e “Conferencia di CHI” (Child Help Line International), cu lo tuma lugar den e Pais aki menciona. E conferencia aki tin un duracion di tres dia, y a inicia dia 22 di September cu a pasa.
Den un entrevista cu DIARIO, Milliard a splica CHI ta algo hopi grandi na nivel mundial, di cual Aruba tin 26 aña caba ta parti di dje, cu Telefon pa Hubentud.
El a splica cu tin mas di 184 diferente Telefon pa Hubentud na mundo, cu ta bin hunto y cu ta parti di e organizacion aki y cu asina nan lo por intercambia informacion cu otro, kico ta sosode na henter mundo, kico ta sosode den nos area, p’asina nos por yuda e personanan miho pasobra cosnan cu por ta a sosode afo, ta bin Aruba of cosnan cu ta sosode na Aruba cu nos a busca un solucion p’e, ta bay afo tambe.
“Anto, pesey ta hopi importante pa bin hunto pa combersa encuanto diferente desaroyo positivo of menos positivo tocante di e yudanza di hoben of di e comunidad cu bo ta aden” Shurman Milliard a subraya.
El a indica cu durante tres dia e conferencia aki lo tuma lugar, na Bogota, Colombia, unda tur e participantenan lo bin hunto pa combersa riba un tema en special, cu ta Social Media, Inteligencia Artificial (IA), y su efectonan cu e fundacionnan ta yuda cu ne.
“Nos ta papiando di cosnan positivo y menos positivo, pero kico esaki tin di haber cu con e hobennan ta intercambia informacion cu otro, con nan por wordo stimula na un manera positivo of negativo door di Social Media y IA, y con nos mes por prepara pa e futuro cu e maneho cu Child International Help Line tin. Naturalmente 131 ta sostene esaki tur aña caba. Dus, nos ta orguyoso cu nos ta bay aya un rato pa intercambia di informacion”, Milliard a señala.
