Stichting Monumentenfonds Aruba lo tuma over restauracion di algun Misa

Directora Anne Witsenburg-de Jong a splica:

ORANJESTAD (AAN) – Directora di Stichting Monumentenfonds, señora Anne Witsenburg-de Jong, den entrevista cu DIARIO a bisa cu tin dos grupo cu ta hopi activo, pa loke ta restauracion di edificio. Uno ta Protestant gemeente Aruba, y e otro ta Seroe Colorado Community Church Foundation.

Directora di Monumentenfonds a expresa cu e instancianan aki ta drecha loke nan por, pero mester corda cu nan ta comunidadnan chikito, y nan no por logra full un restauracion y mantencion, manera e monumentonan merece.

“Pa cu esaki mi ta kere ta miho si nos tum’e over, laga nan bay Misa cualkier momento cu nan mester, pero e actividad cu nos tin cu haci pa explotacion mester pas cu e concepto di Misa. Bo no por pone un discoteca den dje, of haci algo asina aki, pa eigenlijk tuma over y cuida di e monumento Land, pasobra Land Aruba no ta haci mantencion aworaki. E comunidadnan cu ta haci uzo di dje nan fondonan ta limita, e cupo ta mucho chikito. Cu super bon intencion nan a haci hopi cos caba”, señora Witsenburg-de Jong, a bisa.

El a agrega cu ultimamente, full un grupo, unda a atrae hopi hende hoben tambe, a yuda pa haci e tereno limpi, pero ora tin yobida yerba ta crece bek.

Aunke no tin un calculacion ainda e restauracion di e monumentonan concerni, ta bay sali mas cu un miyon florin, Witsenburg-de Jong a señala.

Stichting Monumentenfonds a caba di manda basta raport pa gobierno, un par di aña pasa nan a manda un constructor pa garantiza cu e propiedad no ta bay cay den otro, riba termino cortico, y tur esaki nan a comparti cu gobierno, a menciona.