Parlamentario Jennifer Arends-Reyes, tocante turismo:
ORANJESTAD (AAN) – Parlamentario Jennifer Arends-Reyes, di fraccion di AVP, durante un entrevista cu DIARIO, a bisa cu den e parti di calidad di turismo, tin cu wak e ingresonan pa nos pais.
Por ta calidad tambe den locual por wak den e desaroyo di sector hotelero, nos tin e parti di “vacations rental” cu tambe a crece y durante e transcurso di añanan a bira hopi grandi, un segmento cu casi no por wordo poni un banda.
“E ta parti tambe di e turismo cu nos ta atrayendo, y esaki ta algo cu nos tin cu bay evalua, mirando cu esaki tambe tin di haber e falta di vivienda, pa nos localnan mes. Kiermen, ta plannan macro cu bo no por takel un banda so, pero cu mester takel for di diferente angulo, mi ta kere, pa yega na solucionnan faborable”, Parlamentario Arends-Reyes a señala.
Arends-Reyes a menciona cu nan tin un reunion planea di parti di ATA, pa strategia, cual lo tuma lugar na inicio di Juni. Esaki tocante e mercado di Merca.
Jennifer Arends a splica cu Merca ta keda nos mercado mas grandi, di casi 80%. Pa loke ta trata nos bishitantenan Hulanda y Europa tabata tin un porcentahe mas abao, mescos cu Latinoamerica.
“Nos no tin cu lubida cu Latinoamerica hopi biaha ta ‘unrested’, kiermen e no ta trankil pues, locual ta haciendo aworaki, strategicamente, tambe ta busca otro tipo di turismo, cu por yega na locual ta ser kita di parti di Merca. Mi ta spera cu no ta dje hopi ey. Na e momentonan aki nos tin cu repone 5%, podise cu otro destinacionnan”, e Parlamentario a señala.
