ORANJESTAD (AAN): Riba 17 di mei 2025 nos ta celebra World Telecommunication and Information Society Day (WTISD),
un momento pa reflexiona riba con tecnologia ta forma nos sociedad y con nos por sigura cu su beneficionan ta inclusivo, ta empodera y ta sostenibel. E aña aki ta marca e di 160 aniversario di International Telecommunication Union (ITU), un organisacion global na e curason di conectividad, innovacion y desaroyo digital desde su fundacion na 1865.
ITU a hunga un rol importante den conecta e mundo, di tempo di telegraf pa awo cu capacidadnan revolucionario di Internet, 5G, Inteligencia Artificial y hopi mas. Den 2025, ta importante pa nos reflexiona no solamente riba logronan di pasado, pero tambe con nos ta bay enfrenta desaroyonan y retonan di e futuro digital.
E tema di e aña aki ta ‘Gender equality in digital transformation’, pa promove e uzo igual y inclusivo di tecnologianan di telecomunicacion, informacion y comunicacion pa empodera personanan y sociedadnan pa un desaroyo sostenibel.
Apesar di e progreso tecnologico, hende muhe rond mundo ta keda enfrenta bareranan pa haya acceso na hermentnan digital, educacion y oportunidadnan den ICT. Igualdad di genero ta un motor tras crecemento economico, innovacion y progreso social. Un transformacion digital inclusivo ta garantisa cu tur voz ta contribui den forma e futuro digital.
Companianan di Telecomunicacion ta hunga un rol importante den e transformacion aki door di sostene programanan di ‘digital literacy’, crea canalnan inclusivo pa crea empleo y sigura cu tin acceso igual na conectividad y aparatonan digital.
Na SETAR, como un compania diverso, nos ta reconoce cu empodera hende muhe den tecnologia no ta solamente acceso: e ta encera liderazgo, visibilidad, oportunidad y comunidad. SETAR ta brinda e oportunidad na tur empleado pa siña tur dia, door di tin acceso na plataformanan pa continuamente keda desaroya nan mes.
Recientemente, SETAR a anuncia tambe cu a finalisa e proyecto di Fiber ‘Next Generation’, conectando tur scol na Aruba riba Fiber. Cu esaki cada mucha tin acceso igual na recursonan y posibilidadnan pa siña, crece y desaroya nan mes. Ademas, tur aña SETAR ta sostene iniciativanan y programanan cu ta promove e uzo di tecnologia pa personanan di tur edad.
SETAR, como nos compania nacional di telecomunicacion, ta orguyoso di por duna bek na nos comunidad y inverti continuamente den crea oportunidad, desaroyo tecnologico, conexion tur caminda y un futuro digital sostenibel pa nos tur na Aruba.
