Stichting HUNTO a acudi dilanti di ex-RBC den caya grandi pa yuda ‘vang op’ adictonan ambulante

ORANJESTAD (AAN): Directora di Stichting HUNTO, señora Dalgis Montalvo,

a splica di e situacion di e problematica cu adictonan ambulante ta causa dilanti edificionan di negoshinan, dunando asina un mal bista door di e condicion cu nan ta laga e propiedadnan aden.

   Hunto cu KPA y City Inspector, Stichting HUNTO a acudi dilanti di ex-RBC den caya grandi pa yuda ‘vang op’ adictonan ambulante cu mester a ser movi momento cu City Inspector y KPA haci e luga limpi.

   Pa algun tempo caba a constata cu tin adictonan ambulante den diferente sitio y a bin otronan acerca haciendo e problematica mas grandi. Comerciantenan a cuminsa keha y a pidi ayudo pa e problema di e molester cu adictonan ta ocaciona no solamente di e sushedad cu ta keda dilanti di nan edificio sino cu nan ta sinti nan mes insigur. “Stichting HUNTO, hunto cu diferente stakeholders, a bin hunto pa percura pa soluciona e problematica aki’, señora Montalvo a remarca.

   Señora Montalvo a duna di conoce cu esaki no ta un situacion cu por soluciona completamente di biaha pero hunto nan lo keda haci e accionnan aki pa asina pone presion riba adictonan pa nan por tin e motivacion pa yega na e ‘inloophuis’ di Stichting HUNTO, unda cu nan por baña, come y mas importante, haya e ayudo necesario. E tarea, segun señora Montalvo, ta bira un tiki mas dificil pasobra ta trata den e caso aki di adictonan cu no kier ayudo. Pero lo sigui haci e accionnan aki pa asina motiva nan pa busca y acepta e ayudo cu Stichting HUNTO ta brinda nan pa asina nan por tin oportunidad di cambia y bira tambe ciudadanonan productivo den nos comunidad.