Comerciante Frank Thielman:
- Den bista di tur hende adictonan ta parti crack-cocaine
ORANJESTAD (AAN) E problema cu e comerciantenan situa den Caya Grandi tin cu e adictonan ambulante, ta di hopi aña caba ta tumando lugar.
Un di e comerciantenan cu tabata presente ora accion a tuma lugar, y cu tin keho tocante e situacion aki, ta señor Frank Thielman. Den entrevista cu Matutino DIARIO, el a splica pakico e mester a bati bell ta pasobra e problema a move den bista di tur hende, y full meymey di Caya Grandi.
“Di un banda ta wordo promovi actividadnan pa bin den Caya, y di otro banda no ta tuma accion riba e problema ey. E miedo cu mi a wak caba ta cu e problema di adicto ta comun, normal, personahe, tin hende ni ta wak e problema mas. Anto e ora ey e adictonan ta haya mas ‘power’, nan ta bin gewoon den Caya y den cara di tur hende ta haci nan cosnan”, señor Thielman a señala.
Thielman a wak con den nan cara e adictonan ta parti Crack-cocaine manera ta bolo, comosifuera nada ta pasa.
Tocante e instancianan cu a bin cu accion señor Thielman a bisa cu lo ta bon pa nan splica kico nan proposito ta, cuminzando for di e accion aki, pero lo ta bon si nan sigui.
“Pasobra bo mester tin un maneho unda bo ta keda core cu nan, pero mester tin opcion, despues di e di dos, di tres biaha kico? Pasobra nan ta hende cu hopi biaha ta haci’e scondi, nan ta p’atras di edificio. E problema ta bay stop ora nan no ta den lista, kiermen cu e mesun problematica. Pero awo cu el a bira normal den Centro di Caya, durante bay bek na actividad den Caya, tras di bar; yen den caya drumi riba matras, esey mester stop”, segun e comerciante Frank Thielman a subraya.
