Stichting FUNARI lo tin nan Bazaar di Pasco diadomingo awor

ORANJESTAD (AAN):  Brenda Rasmijn di Stichting FUNARI a haci un invitacion na comunidad di Aruba henter pa pasa admira Diadomingo awor di 4 pm te cu 7 pm e obranan cu e clientenan di FUNARI mes ta traha cu material recicla.

Esakinan ta bay ta disponibel durante nan Bazaar di Pasco.

             Nan ta traha tur sorto di obra di man unda cu e cliente ta hopi orguyoso cu e por contribui y ta un forma di traha tambe. Nan ta sinti cu nan ta lanta tur mainta, presenta na trabao y nan ta traha cu placer.

            Rasmijn a agrega cu dia 27 ta bay cuminsa cu pre benta di carchi pa asina por scoge entre un copi koffie, copi thee, awa di lamunchi y pida bolo. Tambe ta bay tin un bar y un cushina bon surti.

            E obranan cu ta bay ta na benta ta cla caba. Ta bay tin musica, aguinaldo y hopi mas pa disfruta na FUNARI diadomingo 27 di November venidero.

            Algo importante ta cu e cliente mes ta bay forma parti di e team organisador, unda nan ta atende cu publico,  ta bay ta tras di caha, nan mes lo splica kico nan a traha. Tin cliente cu lo ta den cushina, den bar pa nan wordo inclui den tur actividad, a expresa.

            FUNARI e biaha aki ta enfoca pa recauda mas cu 5 mil florin den loke ta e benta di articulo diadomingo y si por haya personanan cu kier haci donacion, tur ta bonbini, a agrega.