Awenochi lo presenta e obra di teatro “Stop the beating” na Centro di Bario Dakota
ORANJESTAD (AAN) – En conexion cu Dia Internacional pa eliminacion di violencia contra hende muher, cuater fundacion a uni pa organiza diferente actividad, y nan a bin hunto den un conferencia di prensa pa duna informacion.
Rish-Ann Ammerlaan di Fundacion contra Violencia Relacional (FCVR) ta bezig cu e campaña “Orange the World” cu ta un campaña contra abuso di mucha muher, y hende muher adulto. Esaki ta e di siete aña cu e fundacionnan aki ta participa den dicho campaña.
Na 2016 Fundacion contra violencia relacional a cuminza cu e campaña aki, y nan a colabora cu diferente organizacion, locual no ta un excepcion e aña aki. E aña aki FCVR ta trahando en colaboracion cu CEDEHM, HIAS y UAHCR.
Ammerlaan ta extende un invitacion na e comunidad di Aruba, pa participa den e campaña aki, cual lo tuma lugar di dia 25 di November awo te dia 10 di December. El a señala cu esakinan ta 16 dia hopi importante, di activismo, unda cu e meta tras di esaki ta pa concientiza e comunidad di Aruba durante 16 dia, unda lo organiza conhuntamente cu e otro instancianan menciona, diferente actividad cu e meta di concientiza.
Ammerlaan a menciona e actividadnan di parti di FCVR. Pa dia 24 y 25 di November awo, lo tin un artista yiu di Corsou cu a studia y ta biba na Hulanda, cu lo presenta un obra teatral cu e tema di Abuso di Mucha. E nomber di e obra aki ta “Stop the beating”. El a splica cu e artista aki ta traha riba temanan cu ainda ta tabu den e comunidad, y cu kizas nos no ta durf di papia di nan, y atravez de su obra teatral, e ta haci e tema discutible.
Dia 24 e obra ta pa publico y lo tuma lugar na Centro di Bario Dakota, di 7.30 or pa 9’or di anochi, y e ta invita comunidad di Aruba completo. E lo ta algo sumamente interesante, unda lo por wak cu violencia ta inter-generacional, e ta bin di generacion pa generacion y den un obra teatral e lo wordo presenta. Preferiblemente, ta bon pa registra riba e facebook page di e fundacion, pero si no logra toch ta bon bini.
Dia 25 e obra ta wordo presenta pa e veld social, y lo ta na J.F Kennedy Educational Centre, di 2 pa 4 or di atardi. Dia 26 di November, 3 y 10 di December lo colecta fondo pa e funcionamento di e fundacion. Diferente boluntario lo ta para na rotonde di Santa Cruz, rotonde di Noord, brug di Renaissance, y dilanti Imelda Kleuterschool.
