Inscripcion pa un grupo nobo di Formacion Social a cuminza y ta invita hobennan pa aplica

ORANJESTAD (AAN) – Formacion Social ta bezig cu inscripcion di un grupo nobo.

Den conferencia di prensa a hiba palabra señor Tim van Wijk, Commandant MSKAV, señor Richard Kelly, Companie Commandant di Arumil (Mayor Kelly), Jessica Ras, Coordinador SVT, Joshua Figaroa y Jean kock, Cursiste4a SVT 15.

Comandante Richard Kelly a splica cu SVT tambe ta un di su tareanan cu e ta percura pa cana bon, pero no a elabora mas di e tema, sino cu el a pasa palabra mesora pa señor Joshua Figaroa, Hoofd Instructeur SVT, Sargento di Arumil, y mentor di e Train Unit cu ta envolvi den e aspecto di disciplina, trabao di grupo, y training. Sargento Figaroa a splica cu e parti di entrenamento ta di tres luna.

E prome tres simannan e cursistanan ta keda cera paden, y esaki pa nan haya confianza den e samenwerking, kiermen pa e hobennan confia den nan mes y den nan team, traha cu e coleganan den nan grupo, y tres siman despues, ora nan haya nan chens di bay cas nan tin cu bay traha riba nan mes, ora nan ta bay den nan bida social pafo nan tin cu anticipa y practica loke nan a haya durante nan entrenamento. Despues nan ta bin bek paden, nan ta keda den e simannan y fin di siman ta bay cas bek.

Den e cuatro lunanan  di e fase di Militar, nan ta haya loke ta disciplina, norma y respet (con pa trata hende cu respet). Tambe nan ta haya diferente les y training, cu ta forma parti di ta militar, unda nan tin otro tipo di disciplina tambe, por ehemplo con nan ta reacciona den mondi, kico nan por haci den mondi y nan ta siña con pa sobrebibi.

Tambe nan ta haya training con pa keda resting bao di presion, pa asina nan hiba nan entrenamento trankil no obstante cu ta bao presion.

Sargento Figaroa a haci un invitacion na e hobennan eyfo pa inscribi pa otro aña cu e curso ta cuminza dia 6 di Maart 2023. Tambe via e facebook page di Formacion Social por haya mas informacion y tambe e formulario di aplicacion pa SVT.

E rekisitonan pa forma parti di Formacion Social ta, por ehemplo, ta un persona cu ta haci movecion; di aki pa Maart tin un periodo cu e aspirante por core un tiki. Nan ta haci un test di salud, test di condicion fisico, pa wak mas of menos con e hoben ta para, y djey e ta drenta e opleiding y haya e parti di disciplina, etc. Pa loke ta edad, e  hoben por drenta cu 17 aña pero bayendo pa 18 te cu 24 aña.

Seguidamente, Jessica Ras, Coordinadora di Formacion Social, a reitera cu Arumil ta bezig cu inscripcion di un grupo nobo. El a recorda cu na November aki ya tin 11 aña caba haciendo e trayecto di Formacion Social (SVT).

Pa otro aña nan tin den plan cuminza cu un grupo di mucha homber dia 6 di Maart y na Augustus lo cuminza cu e di dos grupo di SVT damas. E tambe ta invita e hobennan y nan mayornan pa bin Mariniers Kazerne mas pronto posible pa asina e hobennan cuminza cu e procedure di seleccion, pues no solamente inscribi.

El a agrega cu cada trayecto ta dura un aña largo parti den dos fase, di cual e prome parti ta esun militar y semi-militar, unda ta enfoca riba e parti di disciplina y con e hobennan por traha den team, traha riba nan mes y como grupo. Ora nan caba e prome cuater lunanan ta sigui e parti di enseñanza unda nan ta haya diferente curso, nan ta bay core stage na un compania priva of di gobierno, y tur Diaranzon ta den Mariniers Kazerne pa haya training cu ta dura ocho luna, y ora nan finaliza e hobennan ta wordo guia pa wak kico nan kier haci, si busca un trabao, sigui un opleiding, of bay scol. Nan ta busca informacion pa asina e hoben bay aplica sea pa curso, opleiding of trabao.