Stichting Ambiente Nobo cu un ambiente nobo

Union ta haci forsa!

ORANJESTAD (AAN):  Wind Creek Aruba su contribucion na nos comunidad ta uno hopi conoci pa cu nos Long Table Event.  Aña pasa “Stichting Ambiente Nobo” a participa y nan a bira un di e gandadornan di un suma di $2000.  Wind Creek Aruba no solamente tabata kier a entrega un suma di placa pero su Corporate Social Responsibility Community Committee a bay bishitanan tambe. Durante e bishita ey a bira mas cla cu e fundacion tabata tin mester di hopi mas ayudo y e Committee tabata decido pa contribui  na otro forma tambe pa asina duna un man pa cu necesidadnan di e edificio.

            E Committee di Wind Creek Aruba a acudi na otro companianan pa asina realisa diferente proyecto y mehora e edificio. E pueblo di Aruba ta uno uni y aki nos por a mira di berdad cu den union nos por a haci un impacto den bida di e clientenan di “Ambiente Nobo”.

            Pa e projectonan nos a haya cooperacion di APEX Aruba pa realisa y mehora e stupi completo rond di e edificio. Mexim Aruba a colabora cu nos pa e sala grandi haya bentanan mas adecua. Pa yuda e fundacion baha nan recibo di coriente, Wind Creek Aruba a regala solar panel cual e inverter y instalacion a wordo hasi door di Mr. Green. 

            Ademas Diahuebs ultimo dia 6 di maart boluntarionan di diferente departamento di Wind Creek Aruba a finaliza e proyecto caminda e sala principal a haya un verf completo. Esaki a duna e spacio mas claridad y a hacie mas agradabel pa e cliente nan. Hunto den un ambiente ameno boluntarionan y clientenan a wordo sirbi un dushi koffie di Starbucks. Finalmente Lucky Electrical a regala un frishider y nos a percura pa e clientenan por tin un set di sofa nobo nobo.

            Wind Creek Aruba kier a gradici tur e companianan ariba menciona di curason pa cu nan contribucion pa asina hunto nos por a duna “Stichting Ambiente Nobo” un ambiente nobo.

Nos ta contento di por duna bek na nos comunidad tabata comentario di e trahadornan boluntario cu a saca un dia di nan trabou pa traha hunto cu un curason pa duna bek.