ORANJESTAD (AAN): Un alerta pa biento duro y lama localmente bruto a keda emiti, segun e ultimo aviso di Departamento Meteorologico.
Un area di presion halto riba Oceano Atlántico, combina cu un area di presion abou riba parti noord di Colombia, ta creando un grandi diferencia di presion den e region di Caribe.
Como resultado, biento ta spera subi cu un velocidad di mas o menos 23 pa 25 nudo, mientras cu rafaganan fuerte por yega entre 35 pa 40 nudo (Beaufort 8).
Riesgo pa Navegacion
Autoridadnan ta adverti ocupantenan di boto chikito y usuarionan di lama pa tuma precaucion, ya que e condicionnan maritimo por bira peligroso. Lama por resulta bruto, creando un riesgo pa yate, barconan chikito y otro tipo di embarcacionnan.
Ta recomenda pa tur esnan cu tin plan pa sali na lama den e proximo dianan, pa monitorea e actualizacionnan meteorologico y tuma e precaucion necesario pa evita peligronan innecesario.
Mantene seguridad na prome luga y tuma medidanan pa preveni daño of situacionnan peligroso.
