St. Rosa College y St. Dominicus College a participa activamente den 'Caribe Wave 2025'

ORANJESTAD (AAN):   Studiantenan y maestronan di entre otro St. Rosa College y St. Dominicus College a participa

activamente diahuebs mainta durante e training di tsunami 'Caribe Wave' organisa door di Crisis Management Office (CMO).

            Den e caso di St. Rosa College, e maestronan a repasa cu e muchanan y e hobennan tur e reglanan, kico nan mester a haci. Ora cu e señal a drenta pa nan evacua, e maestronan a prepara e studiantenan pa cana bay. E distancia di scol te na unda nan mester a yega, cu tabata Aruba Juniors tabata rasonabel.

            Un punto di atencion tabata cu na caminda varios grupo a topa cu otro scol. Banda di esaki a ripara cu e automobilistanan tabata hopi impaciente y tabata keda pita e muchanan pa nan hala fo'i caminda. Polis a yega na ultimo momento y nan a regla cu e automobilistanan por a para y laga e muchanan crusa manera debe ser.

            Na Aruba Juniors, e scolnan presente a coopera cu otro y a percura pa tur hende tin nan espacio pa para, asina e cabesante a expresa.

            Pa loke ta St. Dominicus College, meneer Lobo a indica cu den nan caso nan a yega na tempo na e sitio unda nan mester a evacua.

            Por bisa cu generalmente, e training a bay bon y lo trece dilanti e aspectonan cu mester mehora pa nan haya atencion,.