Ganadonan di “Standing Ovation 2024” a wordo reconoci

‘A.T.A. ta reconoce coleganan desde 2020, y esnan internacional desde 2024” 

ORANJESTAD (AAN):  Na 2019, A.T.A. cuminsa cu e programa “Standing Ovation”, unda coleganan cu ta duna otro “High-Fives” segun diferente accionnan y balornan cu A.T.A. ta para p’e. Esaki ta inclui pasion, excelencia, unidad, ta pionero, y integridad. E programa aki ta provee tur empleado e mesun oportunidad pa wordo reconoci door di nan coleganan. Miembronan di ekipo tin entre dia 1 di januari y dia 31 di december pa entrega nan “Fives” den sistema.

            Pa 2024, a habri e programa pa e oficinanan den e diferente regionnan, unda coleganan di Oficina principal di A.T.A., esta “headquarters” (HQ) y mercadonan por manda “High Fives” pa otro tambe. Un total di 326 “Five” a wordo entrega den 2024, e cantidad mas halto te cu e momento aki.

            E ganadonan internacional a wordo anuncia internamente algun siman atras. Caresse Imon a sali e ganado di Oficina di A.T.A. na Europa, Heidy Hernandez a sali e ganado di e Oficina na Latino America y Lyndsey Remorin a sali e ganado di e Oficina di Norte America. A invita e ganadonan internacional pa nan tambe por ta parti di e evento anual di ‘Team Building & Recognition’ cu a tuma luga Diabierna parti mainta cu e tema di “Squad Games”.

            Pa esnan di oficinanan internacional, e siman tabata yena cu un programa unda nan por a “work remote” y intercambia, siña di y colabora cu otro colega. Esaki a bira un parti integral di e programa di “Standing Ovation”, esta e premio ta cu nos coleganan por “work remote” na un di nos oficinanan.

            Atardi e parti di e ceremonia di “Standing Ovation” a tuma luga unda Lyndsey Remorin representando Norte America a sali como e ganadora internacional, pues di tur A.T.A. su oficinanan afor.

            Pa loke ta trata e di seis edicion di “Standing Ovation” na HQ, a saca e tres empleadonan cu a ricibi mas “High Fives” durante 2024.

            Na di tres luga e aña aki a keda Josette Croes cu ta fungi como Trade Relations Supervisor.

            Na di dos luga, a keda Marisol Sanchez Maldonado, cu ta fungi como Communications Manager.

            E ganado absoluto a keda den nomber di colega Erika Hincapie, Branding and Niche Specialist.

            A.T.A. ta gradici tur colega pa nan esfuerso, trabou, y dedicacion cumpli durante 2024 y ta felicita tur  ganador di e programa Standing Ovation Awards 2024.