Thomas Ruiz, Secretario di VRA
- E ta papia hopi biaha di esaki pero nada ta wordo haci
ORANJESTAD (AAN) Thomas Ruiz, Secretario di VRA (Vereniging Rijscholen Aruba), ta interesa pa sa cuanto porcentahe di caminda (kilometer) trafico motor ta ocupa (50-60%?). Esaki pa tin un bista wak si aki tin un problema.
Ruiz a señala cu mas trafico congestiona mas problema ta bay tin, pasobra e hendenan tin e cultura di kere cu “bo ta sali laat pero kier yega trempan”.
“Wak, si bo ta laat bo ta laat. Bo tin tambe e fenomeno di e calidad di caretera, pasobra asina awa cay e caretera ta yena cu buraco; e ta causa daño na e vehiculonan” Thomas Ruiz a señala.
Otro fenomeno ta, segun e ta menciona, e Keuringskaart. El a bisa cu tin un compania di seguro cu ta bay declara na programanan den television, cu nan ta duna cobertura, aunke e auto no tin keuringskaart.
“Y mi ta puntra mi mes, pero den bo mesun clausula ta para cu si bo tin keuringskaart no tin cobertura. Pero ora nos combersa cu e companianan di seguro, cu ta algo cu nos ta haci, nos ta haya scucha ‘si, pero si mi no bende e cliente aki e seguro, e keuringskaart ta bay na mi concurencia y e si ta bend’e. Pero tambe bo ta haya DTI, cu ta bisa cu mas di 50% di vehiculonan cu ta registra, no tin keuringskaart. Con por ta?”
E ta haya cu no ta husto cu e personanan cu ta lucha, ta hiba nan auto pa keur y tin nan keuringskaart, tin cu core riba caminda cu hendenan cu nan tire di auto, brake, no ta bon, no tin luz, y ta bin dal riba bo.
“Y kico ta pasa si bo haya dalmento den un auto cu chauffeur no tin rijbewijs, no tin nada. Con bo ta bay cubri e gasto? Mi a yega di bisa hopi biaha pero hopi hende no ta conciente, cuanto un accidente por costa? Den ley nos ta bisa cu e ta cay den 1 pa 1.5 miyon florin, bo tin cu pensa riba gastonan medico cu ta hopi halto”, señor Ruiz a señala.
Tambe tin NV Elmar cu nan ta bisa cu nan ta preocupa, cuanto palo di luz a wordo gedal y no ta wordo informa? Kiermen, cualkier momento un palo di luz por cay bin dal den hende su cabes. Esey nos ta warda? “Eynan bo por wak con grandi e problematica di trafico ta, pero toch nos ta haci manera nada no a pasa” señor Ruiz a comenta.
