SPA, SADA, SEPPA, FTA, SIMAR cu accion y manifiesto pa revoca e Ley “Prestatie management”

ORANJESTAD (AAN) – Manera ta conoci, Diahuebs mainta Sindicato di Polis (SPA), y Sindicato di Aduana (SADA),

hunto cu SEPPA, STA y SIMAR, tabata tin un accion di protesta y a entrega un manifiesto na Gobierno, dirigi na Prome Minister Evelyn Wever-Croes.

   E motibo ta, segun e sindicalistanan, e forma con gobierno kier impone e sistema asina yama “prestatie-management”. Diaranzon e sindicatonan a sinta cu gobierno pa wak si ta hala atras esaki, pero nan a bisa claramente cu no. Esaki a trece cune cu Diaranzon e sindicalistanan a avisa tur nan miembronan pa topa otro, Diahuebs 8’or di mainta na Wilhelmina Park, y dje cana te Bestuurskantoor, pa entrega e manifiesto na Prome Minister.

Edward Maduro, presidente di Sindicato SADA, a splica cu gobierno, cueste loke cueste, kier sigui pusha e “prestatie management system” manera cu e ta. Sindicatonan a informa Gobierno den varios ocasion tur e puntonan cu ta duna nan razon, cu e ley aki mester wordo hale aden.

El a bisa cu gobierno por bin cu cien comision y papia di awe te December, pero tanten cu e ley no wordo revoca, no por haci cambionan den dje. Maduro a señala cu aworaki, si gobierno ta di buena fe, no ta coste nada ni ta bay perde nada, nada ta bay sosode, si ta revoca e ley, y bin cu e cambionan cu e sindicatonan a pidi pa haci, den diferente ocasion.

Segun e gremio sindical envolvi den e manifestacion,  no solamente trahadornan publico cu ta pasando den e parti aki, pasobra intencion ta, posiblemente, pa kita trahado masalmente, for di aparato publico. Y un bez cu esaki cuminza cana den aparato publico, e ta bay door den tur stichting y companianan estatal y priva.

E sindicalistanan en accion ta señala cu ora ambtenaarnan perde trabao masalmente y APFA ta un di e promenan cu ta bay haya un golpi, pasobra no ta bay tin entrada mas na APFA pa e pensionadonan cu ta cobrando aworaki y esnan cu lo yega eynan mañan. Pues, segun e gremionan aki e ley lo bay tin un efecto enorme y peligroso y pesey nan ta bisa y reitera cu e ley aki mester wordo revoca!

E manifiesto a wordo lesa pa tur esnan presente y prensa y seguidamente a keda entrega na Premier Wever-Croes.