Edwin Roos, vocero di SOGA:
*Stop cu OHLA y su acuerdo ta e miho decision!
ORANJESTAD (AAN) -- “SOGA no ta AIB. SOGA y AIB ta dos entidad diferente. SOGA ta e directiva: John Hodgson y mi persona cu nos Raad. Y nos ta wordo asisti diariamente den e trabao, door di personal di AIB; no door di su gerencia. Esey ta hopi importante”, Roos a acentua, continuando cu e rueda di prensa.
SOGA ta ofrece su fondonan di pension, oportunidad pa inverti cu un interes mas halto cu nan ta haya na banco, y cu menos riesgo si nan ta bay inverti pafo, cu pa colmo tin hopi restriccion, pa inverti pafo como fondo di pension. Asina señor Roos a splica.
“Nos ta inverti e fondonan den edificionan pa e bien general. Anto Hospital tambe ta cay bao di esaki. E placa cu nos a paga pa tur e proyectonan aki, no ta placa di gobierno, e ta placa di e lendernan cu ta e fondonan di pension. Entre otro; tin banco tambe cu a fia nos placa, pero principalmente ta e fondonan di pension”, Roos a indica, agregando:
:”E placa di e proyecto di Hospital, particularmente, no ta bay pafo di Aruba tampoco. Tur e contratistanan envolvi ta local. Trabaonan specializa a wordo haci door di e contratista general OHLA.
Y gobierno ta paga bek SOGA su fianza cu nos a haci pa Hospital, pa medio di huur. Dus, poco, poco gobierno ta alivia asina tambe, e peso di e caha di Pais Aruba, door cu nan ta paga bek, poco, poco. No mester paga e proyecto adelanta, y despues purba haye bek via belasting”, señor Roos a recalca.
SITUACION ACTUAL:
Edwin Roos a referi na e situacion actual di e trabaonan di reconstruccion, renovacion y ampliacion di HOH.
“Manera ta conoci e contratista OHLA y SOGA, nos a dicidi di parti e caminda. Danki na e relacion amical y profesional cu nos tabata tin di tanto aña cu nan, nan a bin traha akinan, nan a cuminza cu e proyecto na 2014, y nos a yega na un acuerdo hopi lihe, y hopi beneficioso pa ambos partido, y sigur pa SOGA.
Aunke ambos banda ta lamenta di a yega asina leu, nos a dicidi, manera mi a bisa anteriormente, stop awo, prome cu nos bira enemigo di otro.
Cu Hospital mes ta existi un bon relacion tambe, pasobra nos ta den nan cas caba, seis pa ocho aña caba. Dus, nos tin un bon relacion cu nan, profesional, pero tambe amical. Mas cu 90% di e proyecto ta cla. Falta menos cu 10%. Y gran parti di e material cu mester, ta sea na Aruba caba of e ta na caminda”, Roos a subraya.
El a agrega cu pa SOGA e miho decision cu por a tuma ta dispidi di OHLA cu nan acuerdo. E acuerdo mester wordo finaliza ainda, door di e abogadonan, pero e sobra di e trabao no ta specializa cu nos no por hacie cu nos propio contratistanan, cu ya caba a traha tur e añanan aki, riba e proyecto. Pues, esey ta eigenlijk e situacion actual!
