Sindicatonan kier mustra gobierno cu e ley di 'Prestatiemanagement' ta devastador pa tur ambtenaar

Edward Maduro, Vocero di Bloke Sindical:

ORANJESTAD (AAN):  Edward Maduro, Presidente di SADA y Vocero di Bloke Sindical (SEPPA, SPA, SIMAR, FTA, TOPA y SADA) a splica cu dialuna mester a entrega un peticion na Conseho di Minister pa un reunion mas pronto posibel cu fecha mas tarda di diabierna awor 3 di Maart riba e ley di 'Prestatiemanagement'.

            Maduro a indica cu gobierno a introduci 'Prestatiemanagement' 1 di Januari 2023. Tabata tin varios reunion cu gobierno y rueda di prensa di e sindicatonan unda cu e ultimo reunion cu gobierno tabata 27 di Januari y di e dia ey te dia di awe nada concreto no a tuma lugar di parti di gobierno, a bisa.

            Segun e sindicalista, a pesar cu a señala tur e preocupacionnan pa locual ta trata e ley aki, cu ta devastador pa e ambtenaar sin importa den ki funcion e ta.

            E sindicatonan a keda reuni internamente y haci e trabaonan necesario pa por mustra gobierno cu e ley aki ta devastador y cu no tin otro opcion cu 'trek in' e ley aki. Kier bin cu un ley unda na un manera hopi facil por yega na kita hende, a pesar cu gobierno den un carta a bisa cu aña 2023 ta bay ta un aña di transicion, pero den e ley esey no ta poni, a remarca.

            Edward Maduro a agrega cu si no bin ningun ahuste den e ley aki, 2023 ta keda conta normalmente pa tur hende y esey ta un di e puntonan cu nan ta bisa cu nan ta hopi preocupa cu ne.

            Pa e sindicatonan ta hopi importante ya cu e 'deadline' pa e combersacionnan ta e siman aki mes, pero gobierno no a haci nada pa atende cu e sindicatonan riba nan preocupacion. Mientrastanto, menasanan na pia di trabao ta sigui, hefenan ta kere cu nan ta intocabel. Pero e miedo di represaya, pa e motibo ey no a duna nomber ainda na gobierno, pero ora cu yega asina leu lo haci'e, a splica.

            Pero e punto principal ta cu e ley aki nan ta para riba cu e mester wordo hala aden pa asina por sigui delibera na mesa cu gobierno, Maduro a finalisa bisando.

            A aclarea cu nan no ta contra un 'prestatiemanagement' pero esaki mester ta bon hinca den otro.