Heinz awor ta buscando e naufrago aki pa asina regale un boto nobo

E naufrago di St. Maarten cu a sobrevivi 24 dia riba lama comiendo ketchup...

ORANJESTAD (AAN): Tabata e siman di 19 di Januari 2023 cu DIARIO a publica e informe di e odisea cu un persona di St. Maarten a pasa aden, ora cu el a drief for di e isla ey y yega te dilanti Colombia unda porfin el a wordo rescata.

   E naufrago a bin divulga cu el a sobrevivi 24 dia riba Lama Caribe, comiendo ketchup di tomati, conoflok na polvo (‘garlic powder’), y bouillon di galiña.

   Alimentando su mes cu e tres cosnan aki, asina Elvis Francois di 47 aña a sobrevivi su pesadiya di 24 dia riba Lama Caribe, y el a wordo haya riba lama net dilanti departamento di La Guajira na Colombia.

   No tin experiencia di nabegacion: Elvis Francois ta procedente di Dominica, y el a splica cu dia 25 di December e tabata na St. Maarten hulandes na oriya di lama ta haciendo mantenimento na diferente boto di bela, ora cu tempo a bira malo y cu biento y coriente a pushe bay pa lama grandi.

   El a bisa cu e tabata na un Pier ta drechando un boto hunto cu dos homber mas, pero na un momento cu el a keda su so, el a perde control di e boto den cual e ta pasobra a dura hopi pa pone bela y drecha esaki.

   Tempo malo cu coriente fuerte di lama a pusha e boto bay mas leu.  “Mi a purba yama mi amigonan, pero mi a perde señal di celular, y no tabatin nada mas di haci, y djis sinta y warda.”

   Come ketchup bay goal: El a bisa cu e no tabatin nada di cuminda, excepto di un boter di ketchup cu tabatin den e boto, conoflok na polvo, y un bouillon di galiña marca Maggie.  “Pues mi a combina nan cu awa, y esey a yudami sobrevivi 24 dia riba lama.”

   E no tabatin awa, pues el a haye ta hidrata su mes cu e poco awa cu e por a capta di condensacion cu tabata forma na e bela di e barco, y den un saco, segun comandante Carlos Urbano Montes di Colombia a indica.

   E homber no tabatin ningun experiencia den navegacion, y pesey el a keda perdi y desorienta riba lama.  Su esfuerzonan pa maniobra e boto y e equiponan abordo, no a duna resultado.  Unico cu el a haci den su desesperacion tabata marca e palabra “HELP” full na banda di e boto, y esey a logra cu na final el a wordo rescata.

   Autoridadnan Naval Colombiano a ricibi informacion cu tin un boto di bela ta drief cu e palabra “HELP” na banda, y asina a start un accion di buskeda y rescate di e persona.

   Elvis Francois a wordo rescata na 222 kilometer noordwest di Puerto Bolivar, na departamento di La Guajira.  Armada Colombiana a dune atencion medico, y a wordo manda pa Migracion Colombia pa cuminza cu e proceso pa debolbe bek pa St. Maarten.

   Awor Heinz ta buske: Mientras tanto, e compania fabricante di e popular Heinz Ketchup, a cuminza pidi yudanza di publico, pa por logra localiza e naufrago aki kende ya lo a bay bek pa sea St. Maarten of isla di Dominica.

   E meta di e operacion di buskeda aki cu a start dia 14 di Februari 2023, ta pa regala Elvis Francois di 47 aña, un boto, aunke ora el a wordo rescata el a bisa Colombianonan cu e no sa nada di nabegacion.

   “To whoever finds this message, we need your help tracking down an amazing man with an amazing story.”  Esey ta e mensahe cu Heinz a manda.

   “Nos ta busca pistanan confiable pa contact Elvis pa ofrece un boto nobo, equipa cu tecnologia di nabegacion y asina evita otro desastre den futuro,” ta loke e compania H.J. Heinz Company a pone den un mensahe poni riba nan account di Instagram.

   “Well, Heinz wants to celebrate his safe return home and help him buy a new boat... but we can’t seem to find him.”

   A sali na cla cu ora cu Heinz a tende di e storia, nan a dicidi cu lo ta algo bunita pa haci y e ta alavez un campaña di mercadeo hopi inteligente, si acaso nan logra haya Francois y dune un boto nobo.. uno ‘equipa cu tecnologia completo di nabegacion pa evita un otro desastre den futuro.”

   Nan a trata di localize prome, door di contact gobierno di Dominica pa haye, pero nan esfuerzo no a logra hopi.  E ora Heinz a puntra Armada Colombiano, pero ningun di nan no sa unda el a bay tampoco.  Pesey dia 14 di Februari, Heinz a bay riba Social Media sperando cu Internet lo por yuda.

   Pesey awor nan ta manda e mensahe aki riba lama di Internet, sperando cu un hende na Dominica of St. Maarten por yuda localiz’e... pa e bay ricibi su boto nobo.