E lo tuma lugar na Aruba na Mei durante 3 dia
ORANJESTAD (AAN) – Den conferencia di prensa di Gobierno, Diamars cu a pasa, Minister Glenbert Croes, a duna di conoce cu e Conferencia Caribense pa Clima y Energia, cu lo tuma lugar na Mei proximo, ta bay tuma tres dia.
Un dia ta bay ta dedica na e Paisnan miembro di Reino Hulandes, nan propio compromiso, nan rumbo, e metanan pa 2030-2050, kico nan ta bay haci na inversion, concientizacion, educacion, implementacion, pa asina percura pa henter Aruba cana e caminda.
“Nos como comunidad cana e caminda di aporta den nos conducta, na bo cas na bo auto, den nos trabao pa percura pa na 2030-2050 nos ta biba den un pais sin polucion y cero emision; y kico riba tema climatico lo mester wordo atendi, pa cumpli cu e metanan di e Acuerdo di Paris na 2050, pa nos biba den un mundo cu no tin polucion”, Minister Croes a reitera.
E di dos dia lo wordo dedica na e tema di energia. Kico ta e tereno energetico, kico ta e transicionnan cu nos ta haciendo, pa asina cumpli cu di parti di energia e paisnan miembro di Reino no ta aporta daño na nos medio ambiente ni na polucion, y kico ta e inversionnan cu mester haci na WEB, na ELMAR, na Utilities, kico mester haci den henter comunidad, pasobra nos biba ta bay cambia, unda cu transporte en general ta bay core riba electricidad of hidrogeno.
Tur loke ta wordo uza na cas ta genera pa un energia limpi, y pesey mes ta importante pa e decision tuma pa gobierno di Aruba, di implementa Eagle LNG, riba e di tres dia expone e decision aki y e aprobacion tambe di Gobierno di Aruba, pa sostene e proyecto aki, unda cu WEB Aruba NV, cu ta un di e companianan cu tin hopi emision di CO2, door cu e ta uza heavy fuel oil (HFO), ta bay pasa den e transicion pa uza gas natural. Esaki ta un di e decisionnan grandi cu a wordo tuma den e prome cuater lunanan di Gabinete Wever-Croes-2.
Den e siguiente 30 lunanan WEB lo stop di uza HFO, y WEB ta tumando e decision grandi pa pasa pa gas natural, pa baha e emisionnan, enormemente, pasobra gas natural ta hopi mas limpi cu HFO.
“Durante e di tres dia di e conferencia, tambe nos lo presenta nos vision pa e Aruba Hydrogen Valley. E prome Hydrogen Valley den nos region”, e mandatario a duna di conoce.
