Sindicato STA a firma CAO nobo cu Paradise Beach Villas

Hopi adelanto pa e empleadonan

ORANJESTAD (AAN): Siman a habri cu e momento special, ora cu directiva di Sindicato STA conhuntamente cu su delegadonan y gerencia  di e compania "Paradise Beach Villas" a firma e CAO, (Contrato colectivo)  nobo pa e compania.

   Cu e CAO nobo aki, e empleadonan lo conoce un adelanto riba diferente aspecto cualnan ta entre otro aumento salarial di mas cu 12% reparti den 3 an̈a, tambe aumento den e dianan di vacacion, dianan liber cu pago tambe a conoce aumento, bonus di fin di an̈a tambe a conoce aumento, e fondo di spaar vacacional tambe a subi, mihor areglo pa uniform pe empleadonan.

   E CAO nobo a pone cu den "housekeeping" tambe a conoce aumento pa cada "rollaway bed" y tambe a baha e cantidad di camber cu e empleadonan den e departamento aki mester haci limpi pa dia, cual ta un alivio grandi.

   Pa loke ta hubileo pa an̈anan di servicio tambe a conoce aumento, e vouchernan di cuminda ora di "overtime" tambe a conoce aumento.  Aparte cu tur empleado lo bay ta trahando 5 dia so pa siman directiva di STA conhuntamente cu gerencia a introduci un incentivo pa dia di labor cual ta un articulo completamente nobo.

   E contrato colectivo lo ta valido entrante dia 1 di Januari 2026 te cu 31 di December 2028.Tambe a introduci dia liber pa e empleado riba e dia di su "cumplean̈os" cual a cay den masha bon tera cerca e empleadonan.

   Directiva di STA kier a gradici gerencia di "Paradise Beach Villas" cual team di negociacion a consisti di Freddy Albertus (Managing Director), Melvin Colin (Financial Comptroller) y Yina Viatela (HR) sin lubida e delegadonan Amaro Maduro y Silvia An̈ez kende nan a haci un tremendo trabao.

   Directiva di STA kier a felicita e empleadonan y gerencia di e compania pa cu e tremendo logro aki y Dios mediante tur hende den e compania lo disfruta di dje den e an̈anan venidero.  Un biaha mas pabien.